ہاتھرس فرضی انکاؤنٹر معاملے میں اتر پردیش کے دو پولیس افسران معطل

ہاتھرس: اترپردیش پولیس حکام نے بتایا کہ پولیس سپرنٹنڈنٹ نے منگل کو ایک مبینہ فرضی انکاؤنٹر کیس کے سلسلے میں دو پولیس افسران کو معطل کر دیا۔ پولیس کے مطابق 9 اکتوبر کو مرسان کے علاقے میں ایک کاروباری کے گھر ڈکیتی کی کوشش کا مقدمہ درج ہونے کے بعد مبینہ انکاؤنٹر میں دو افراد کو گرفتار کیا گیا تھا جس میں ایک ملزم کے پیر میں گولی لگی تھی۔ تاہم زخمی شخص کے اہل خانہ اور کئی سیاسی جماعتوں نے الزام لگایا کہ انکاؤنٹر فرضی تھا۔ لوگوں نے مبینہ تصادم کی غیر جانبدارانہ تحقیقات اور قصوروار اہلکاروں کے خلاف سخت کارروائی کا مطالبہ کیا۔ اہل خانہ نے ایس پی سے ان کے دفتر میں ملاقات بھی کی جس کے بعد ایس ایچ او ممتا سنگھ اور انچارج انسپکٹر مکیش کمار کی معطلی کا حکم دیا گیا۔ سپرنٹنڈنٹ آف پولیس (ایس پی) چرنجیو ناتھ سنہا نے کہا کہ مرسان پولیس اسٹیشن کی اس وقت کی اسٹیشن ہاؤس آفیسر ممتا سنگھ اور انسداد چوری ٹیم کے انچارج انسپکٹر مکیش کمار کو لاپرواہی برتنے پر معطل کر دیا گیا ہے۔ انہوں نے مزید کہا کہ غیر جانبداری کو یقینی بنانے کے لیے اس کیس کی تفتیش سرکل آفیسر (سٹی) کی نگرانی میں ہاتھرس گیٹ پولیس اسٹیشن کے اسٹیشن ہاؤس آفیسر کو سونپی گئی ہے۔

Source: Social media