اسٹالن نے ہار قبول کی

چنئی، 4 مئی :تمل ناڈو کے وزیر اعلیٰ اور ڈی ایم کے صدر ایم کے اسٹالن نے کہا ہے کہ انہوں نے سر جھکا کر عوامی مینڈیٹ کو قبول کیا ہے اور ایک م¶ثر اپوزیشن کے طور پر لوگوں کی خدمت جاری رکھنے کا عہد کیا ہے ۔اداکار سے سیاست دان بنے وجے کی نئی پارٹی 'تملاگا ویٹری کژگم' (ٹی وی کے ) ریاست کی سب سے بڑی پارٹی بن کر ابھری ہے اور تمل ناڈو میں اگلی حکومت بنانے کے لیے پوری طرح تیار ہے ۔ ٹی وی کے نے انتخابات کے بعد کے تمام اندازوں کو غلط ثابت کرتے ہوئے ریاست کے سیاسی اقتدار پر زوردار قبضہ جمایا اور کل 234 نشستوں میں سے 107 پر جیت حاصل کی ہے ۔ وہیں ڈی ایم کے 74 نشستوں کے ساتھ دوسری سب سے بڑی پارٹی بن کر رہ گئی، جبکہ اہم اپوزیشن جماعت اے آئی اے ڈی ایم کے کی قیادت والا این ڈی اے محض 53 نشستوں کے ساتھ کافی پیچھے ، تیسرے مقام پر کھسک گیا۔ مسٹر اسٹالن نے 'ایکس' پر لکھا، "ہم سر جھکا کر لوگوں کے فیصلے کو قبول کرتے ہیں۔ جیتنے والوں کو مبارکباد!" انہوں نے کہا کہ "گزشتہ پانچ برسوں میں، ہم نے کئی اسکیمیں شروع کی ہیں اور تمل ناڈو کے لوگوں کو اچھی حکمرانی فراہم کی ہے ۔ ہم نے ہر طرح سے تمل ناڈو کی ترقی کی ہے ۔ ہم نے اپنی کامیابیوں کو اجاگر کرتے ہوئے ووٹ مانگے تھے ۔ ہم نے ان فلاحی پروگراموں کو جاری رکھنے کے لیے ووٹ مانگے تھے ، جنہیں ہم نے نافذ کیا تھا۔" انہوں نے کہا کہ "میں تمل ناڈو کے ان تمام لوگوں کا تہہ دل سے شکریہ ادا کرتا ہوں جنہوں نے ڈی ایم کے کی قیادت والے 'سیکولر پروگریسو الائنس' (ایس پی اے ) کی حمایت میں ووٹ دیا۔ اس اتحاد نے نہ صرف ان لوگوں کے لیے حکومت کی جنہوں نے اسے ووٹ دیا، بلکہ ان لوگوں کے لیے بھی کام کیا جو ووٹ ڈالنا بھول گئے تھے ۔" انہوں نے مزید کہا کہ "اپنی سیاسی اور عوامی زندگی میں، میں نے بڑی بڑی جیتیں دیکھی ہیں؛ میں نے ہار کا سامنا بھی کیا ہے ۔ اس لیے ، میں ایک ایسا شخص ہوں جو اس سمجھ کے ساتھ کام کرتا ہے کہ جیت اور ہار سے زیادہ، نظریات اور پالیسیاں ہی سب سے زیادہ اہمیت رکھتی ہیں۔ لہٰذا، ڈی ایم کے کا سیاسی سفر بغیر کسی رکاوٹ کے جاری رہے گا۔"

Source: UNI NEWS