آر ایس ایس تقریب پر راج ٹھاکرے کا سخت ردعمل ، خوف کی بنیاد پر شرکت کا الزام

ممبئی ، 10 فروری: مہاراشٹر نونرمان سینا کے سربراہ راج ٹھاکرے نے 10 فروری بروز پیر آر ایس ایس کے سرسنگھ چالک موہن بھاگوت پر شدید تنقید کرتے ہوئے الزام لگایا کہ تنظیم کی صد سالہ تقریب میں شریک کئی نامور شخصیات محبت کی بنیاد پر نہیں بلکہ نریندر مودی حکومت کے خوف کے تحت وہاں موجود تھیں۔ موہن بھاگوت کو مخاطب کرتے ہوئے راج ٹھاکرے نے کہا کہ دوسروں کو لیکچر دینے سے پہلے آر ایس ایس کو اس حکومت سے سوال کرنا چاہیے جو ملک بھر میں ہندی زبان مسلط کرنے کی کوشش کر رہی ہے ۔ ان کا کہنا تھا کہ اگر سنگھ سیاسی م¶قف اختیار کرنا چاہتی ہے تو اسے سب سے پہلے حکومت کی پالیسیوں پر تنقید کرنی چاہیے ۔ راج ٹھاکرے ، موہن بھاگوت کے اس بیان پر ردعمل ظاہر کر رہے تھے جس میں انہوں نے زبان کے مسئلے پر ہونے والی تحریکوں کو مقامی سطح کی بیماری قرار دیا تھا۔ راج ٹھاکرے نے اس تبصرے کو ناقابل قبول قرار دیتے ہوئے کہا کہ وہ آر ایس ایس کے کام کا احترام کرتے ہیں، مگر تنظیم کو بالواسطہ سیاسی م¶قف اختیار کرنے سے گریز کرنا چاہیے ۔ انہوں نے گجرات میں پیش آنے والے ان واقعات پر بھی سوال اٹھایا جہاں اتر پردیش اور بہار سے تعلق رکھنے والے ہزاروں افراد کو مبینہ طور پر نکال دیا گیا۔ انہوں نے کہا کہ وہاں ہم آہنگی کا سبق کیوں نہیں دیا گیا اور کرناٹک، تمل ناڈو، آندھرا پردیش، پنجاب یا مغربی بنگال میں ایسی باتیں کیوں سامنے نہیں آئیں۔ لسانی اور علاقائی شناخت پر زور دیتے ہوئے راج ٹھاکرے نے کہا کہ ایسی شناختیں ہمیشہ ملک میں موجود رہیں گی، جن میں مہاراشٹر بھی شامل ہے ۔ انہوں نے خبردار کیا کہ یہ ریاست کا وقار ہے اور جب بھی ایسی صورتحال پیدا ہوگی، مہاراشٹر پوری شدت کے ساتھ کھڑا ہوگا۔

Source: UNI NEWS