آن لائن بیٹنگ اور جوئے کی ایپس چلانے والے یوٹیوبر سے لگژری گاڑیاں برآمد

آن لائن بیٹنگ اور جوئے کی ایپس چلانے والے یوٹیوبر سے لگژری گاڑیاں برآمد کر لی گئیں۔ اتر پردیش کے ضلع اُناؤ کے رہائشی انوراگ دویدی کے گھر تلاشی کے دوران لیمبورگینی یورس، بی ایم ڈبلیو زیڈ فور اور مرسڈیز بینز سمیت 4 مہنگی اسپورٹس کاریں برآمد کی گئی ہیں۔ آن لائن بیٹنگ اور جوئے کی ایپس کے ذریعے غیر قانونی دولت کمانے والے یوٹیوبر انوراگ دویدی کے خلاف انفورسمنٹ ڈائریکٹوریٹ (ای ڈی) نے بڑی کارروائی کی ہے۔ ادارے کے مطابق انوراگ دویدی نے اسکائی ایکسچینج اور دیگر آن لائن جوئے کی ایپس کی تشہیر کر کے خطیر رقم کمائی۔ حکام کا کہنا ہے کہ اس غیر قانونی آمدن کو مختلف طریقوں سے منی لانڈرنگ کے ذریعے سفید کیا گیا اور پھر لگژری گاڑیوں اور قیمتی اثاثوں کی خریداری میں استعمال کیا گیا۔ تفتیش میں انکشاف ہوا ہے کہ دویدی نے غیر قانونی کمائی سے حاصل اثاثوں کو جائز ظاہر کرنے کی کوشش کی، وہ اپنے یوٹیوب چینل پر جوئے اور بیٹنگ ایپس کی تشہیر کرتا تھا، جس کے باعث بڑی تعداد میں لوگ ان پلیٹ فارمز سے جڑ گئے۔ تحقیقات کے دوران معلوم ہوا کہ غیر قانونی رقوم حوالہ نیٹ ورک، مول اکاؤنٹس اور نقد رقم کے ذریعے وصول کی گئیں، جبکہ دویدی اور اس کے اہلِ خانہ کے بینک اکاؤنٹس میں بڑی رقوم بغیر کسی جائز کاروباری جواز کے منتقل ہوئیں، یوٹیوبر نے دبئی سمیت بیرونِ ملک غیر منقولہ جائیدادیں بھی خریدیں۔

Source: social media