تیہٹہ میں عدالت کے احاطے سے لڑکی کو لے جانے کا الزام، نوجوان کی پولیس سے ’میری بیوی کو واپس دلائیے‘ کی اپیل
محبت کی خاطر ایک نوجوان لڑکی نے اپنا گھر چھوڑ دیا اور اپنے محبوب سے شادی کرلی۔ لیکن خاندان نے اس رشتے کو قبول نہیں کیا۔ لڑکی کے اہل خانہ نے تھانے میں اغوا کی شکایت درج کرائی۔ لڑکی عدالت میں پیش ہوئی اور جج کے سامنے اپنا بیان بھی ریکارڈ کرایا۔ الزام ہے کہ عدالت سے باہر نکلتے وقت اس کے اہل خانہ نے زبردستی اسے ایک گاڑی میں بٹھا کر اپنے ساتھ لے گئے۔ یہ واقعہ نادیہ کے تیہٹہ میں پیش آیا۔ نو بیاہتا نوجوان نے پولیس اور ایس ڈی پی او سے اپنی بیوی کو واپس دلانے کی پ±رزور اپیل کی ہے۔
پولیس ذرائع کے مطابق، تیہٹہ تھانے کے جیت پور ہابری پاڑہ کے 24 سالہ نوجوان کا چاتر پاڑہ کی 18 سالہ لڑکی کے ساتھ محبت کا رشتہ تھا۔ تاہم لڑکی کے اہل خانہ اس رشتے کے لیے رضامند نہیں تھے۔ مجبور ہوکر 28 ستمبر کو لڑکی اپنی مرضی سے نوجوان کے گھر چلی آئی۔ وہیں دونوں نے سماجی رسم و رواج کے مطابق شادی کرلی۔
واقعے کے بعد لڑکی کے اہل خانہ نے تیہٹہ تھانے میں اغوا کی تحریری شکایت درج کرائی۔ شکایت کی بنیاد پر اسی رات پولیس نو بیاہتا جوڑے کو تھانے لے آئی۔ اگلے روز دونوں کو تیہٹہ عدالت میں پیش کیا گیا، جہاں لڑکی نے جج کے سامنے اپنا بیان ریکارڈ کرایا۔
نوجوان کا کہنا ہے کہ عدالت سے باہر نکلتے ہی گیٹ کے سامنے گھات لگائے سسرال کے افراد نے زبردستی اس کی بیوی کو ایک گاڑی میں بٹھایا اور وہاں سے فرار ہوگئے۔ الزام ہے کہ روکنے کی کوشش کرنے پر نوجوان کے اہل خانہ کے ساتھ مارپیٹ بھی کی گئی۔ نوجوان کے خاندان نے ناراضی ظاہر کرتے ہوئے کہا کہ واقعے کے دوران 100 نمبر پر فون کرنے کے باوجود انہیں پولیس کی جانب سے کوئی مدد نہیں ملی۔
فی الحال اپنی بیوی کی جان کو خطرہ لاحق ہونے کے خدشے کے پیش نظر نوجوان پولیس انتظامیہ سے مدد کی اپیل کر رہا ہے۔ تیہٹہ کے ایس ڈی پی او دفتر کی جانب سے بتایا گیا ہے کہ شکایت درج کر لی گئی ہے اور کارروائی کی جا رہی ہے۔