اشٹمی کی رات بیوی کا سر کاٹ کر درگا کے چرنوں میں چڑھانے کا الزام
درگا پوجا کے دوران بانکوڑہ میں ایک کے بعد ایک سنسنی خیز واقعات سامنے آ رہے ہیں! درگا نومی سے لاپتہ ہونے والی ایک بزرگ خاتون کی سڑی گلی لاش منگل کے روز دھان کے کھیت سے برآمد ہوئی۔ ان کی موت کیسے ہوئی؟ وہ دھان کے کھیت تک کیسے پہنچیں؟ ان سوالات کے جوابات ابھی تک نہیں مل سکے ہیں۔ اہلِ خانہ کے مطابق، نومی کی دوپہر وہ مقامی پوجا پنڈال میں پرساد کھانے گئی تھیں، جس کے بعد لاپتہ ہوگئیں۔ بالآخر منگل کو ان کی لاش برآمد ہوئی۔ اس واقعے سے علاقے میں شدید سنسنی پھیل گئی ہے۔
پولیس اور اہلِ خانہ کے ذرائع کے مطابق، متوفیہ کا نام پرتیما باگدی تھا اور ان کی عمر تقریباً 70 سال تھی۔ وہ بانکوڑہ کے اندپور تھانے کے تحت پایراچالی گاو¿ں کی رہنے والی تھیں۔ درگا پوجا کے موقع پر وہ کھاتڑا کے بازار پاڑہ میں واقع اپنی چھوٹی بیٹی کے گھر گئی تھیں۔
درگا پوجا کی نومی کے دن دوپہر کو وہ بازار پاڑہ کے درگا پوجا پنڈال میں پرساد کھانے گئی تھیں، جہاں سے وہ لاپتہ ہوگئیں۔ اہلِ خانہ نے انہیں کافی تلاش کیا، لیکن ان کا کوئی سراغ نہیں ملا۔ اس کے بعد پولیس میں گمشدگی کی شکایت درج کرائی گئی۔
منگل کے روز کھاتڑا بازار کے قریب چیاکانالی کے لوکناتھ مندر کے نزدیک ایک دھان کے کھیت سے مقامی لوگوں کو شدید بدبو محسوس ہوئی۔ تلاش کرنے پر بزرگ خاتون کی سڑی گلی لاش برآمد ہوئی۔ پولیس کو اطلاع دی گئی۔ لاش کو برآمد کرکے اسپتال بھیجا گیا۔ اس کے بعد پرتیما کے اہلِ خانہ کو اطلاع دی گئی، جنہوں نے لاش کی شناخت کرلی۔
لاش کو پوسٹ مارٹم کے لیے بانکوڑہ سمیملنی میڈیکل کالج و اسپتال بھیج دیا گیا ہے۔ خاتون کی موت کیسے ہوئی، اس بارے میں ابھی تک کوئی وضاحت نہیں ہو سکی ہے۔ یہ سوال بھی اٹھ رہا ہے کہ وہ دھان کے کھیت تک کیسے پہنچیں۔ پولیس کے مطابق، پوسٹ مارٹم کی ابتدائی رپورٹ آنے کے بعد موت کی وجہ واضح ہونے کی امید ہے۔ پولیس نے واقعے کی تفتیش شروع کر دی ہے۔
قابلِ ذکر ہے کہ درگا پوجا کی اشٹمی کی رات بانکوڑہ میں ہی ایک نوجوان پر اپنی بیوی اور والد کو قتل کرنے کا الزام لگا تھا۔ الزام ہے کہ وہ اپنی بیوی کا سر کاٹ کر مقامی مندر میں رکھ آیا تھا۔ اس واقعے میں تانترک سادھنا کا معاملہ بھی سامنے آیا تھا، تاہم پولیس نے اس بارے میں کوئی بیان نہیں دیا۔ اس واقعے کی تفتیش جاری ہے۔ابھی اس واقعے کی گونج ختم بھی نہیں ہوئی تھی کہ نومی کے دن لاپتہ ہونے والی بزرگ خاتون کی سڑی گلی لاش دھان کے کھیت سے برآمد ہوگئی۔