نئی دہلی، 12 نومبر : بنیادی طور پر خوردنی اشیاء کی قیمتوں کی وجہ سے کنزیومر پرائس انڈیکس (سی پی آئی) پر مبنی مہنگائی کی شرح اس سال اکتوبر میں 6.21 فیصد کی 14 ماہ کی بلند ترین سطح پر پہنچ گئی، جس سے سود کی شرح میں فوری کٹوتی کی امیدیں ختم ہو گئی ہیں۔ اس سال ستمبر میں خوردہ افراط زر کی شرح 5.49 فیصد تھی، جب کہ اکتوبر 2023 میں یہ 4.87 فیصد تھی۔ منگل کے روز جاری سرکاری ریلیز میں کہا گیا کہ "اکتوبر 2024 کے لئے آل انڈیا کنزیومر پرائس انڈیکس (سی پی آئی) پر مبنی افراط زر کی شرح 6.21 فیصد ہے،"۔ دیہی اور شہری علاقوں میں افراط زر کی شرح بالترتیب 6.68 فیصد اور 5.62 فیصد رہی۔ تازہ ترین مہنگائی کی شرح ریزرو بینک آف انڈیا کے درمیانی ہدف کی حد 2 سے 6 فیصد کے بالائی سرے کو عبور کر گئی ہے۔ وزارت شماریات اور پروگرام کی تنفیذ سے جاری کردہ اعداد و شمار کے مطابق رواں سال اکتوبر کے مہینے میں خوردنی مہنگائی 10.87 فیصد رہی۔ رواں سال اکتوبر کے مہینے میں دیہی اور شہری علاقوں میں اشیاء خوردونوش کی مہنگائی کی شرح بالترتیب 10.69 فیصد اور 11.09 فیصد درج ہوئی ہے۔

Source: uni urdu news service