نئی دہلی، 14 نومبر : مکیش امبانی نے ایک بار پھر ثابت کیا ہے کہ وہ نہ صرف ملک بلکہ دنیا کے ایک طاقتور بزنس مین ہیں۔ مکیش امبانی واحد ہندستانی ہیں جنہیں فارچیون میگزین کی طاقتور بزنس مین 2024 کی فہرست میں شامل کیا گیا ہے۔ اس فہرست میں ہندستانی نژاد چھ دیگر افراد بھی شامل ہیں جو بیرون ملک آباد ہیں۔ یہ افراد بڑے کاروباروں کے بانی، چیف ایگزیکٹوز اور اختراع کار ہیں۔ فارچیون نے حال ہی میں کاروباری دنیا کے 100 طاقتور ترین لوگوں کی فہرست جاری کی ہے جس میں مکیش امبانی کو 12 ویں نمبر پر رکھا گیا ہے۔ مکیش امبانی ریلائنس گروپ کے مالک ہیں اور ان کا شمار ملک کے بڑے تاجروں میں ہوتا ہے۔ انہوں نے ریلائنس انڈسٹریز کو نئی بلندیوں پر لے جاکر ایک منفرد شناخت بنائی ہے۔ جیو کو لانچ کرکے انہوں نے ملک کے ٹیلی کام سیکٹر کا چہرہ بدل دیا ہے۔ ملک کی ڈیجیٹلائزیشن نے بھی ترقی کو فروغ دیا ہے۔ کمپنی ریٹیل سیکٹر میں بھی ہر روز نئے ریکارڈ قائم کر رہی ہے۔ کمپنی گرین انرجی سیکٹر پر بھی بھرپور طریقے سے کام کر رہی ہے۔ مکیش امبانی کے علاوہ فارچیون پاورفل بزنس مین لسٹ 2024 میں دنیا کے امیر ترین شخص ایلون مسک پہلے اور این ویڈیا کے سی ای او جینسن ہوانگ دوسرے نمبر پر ہیں۔ ستیہ نڈیلا تیسرے نمبر پر، وارن بفے چوتھے اور جیمی ڈیمن پانچویں نمبر پر ہیں۔ اس فہرست میں ٹم کک 6 ویں نمبر پر ہیں جبکہ مارک زکربرگ 7 ویں اور سیم آلٹ مین 8 ویں طاقتور ترین بزنس مین ہیں۔ میری بارا اور سندر پچائی بالترتیب 9ویں اور 10ویں نمبر پر ہیں۔ مکیش امبانی سے بالکل پہلے، یعنی 11 ویں نمبر پر ایمیزون کے جیف بیزوس ہیں۔

Source: uni news service