اکھلیش یادو کا فالتا میں دوبارہ ووٹنگ پر سوال

نئی دہلی، 3 مئی : سماجوادی پارٹی کے سربراہ اکھلیش یادو نے آج مغربی بنگال کے فالتا اسمبلی حلقے میں الیکشن کمیشن کے دوبارہ ووٹنگ کے فیصلے پر بھارتیہ جنتا پارٹی (بی جے پی) کے خلاف اپنی تنقید کو مزید تیز کرتے ہوئے الزام لگایا کہ یہ اقدام "شرمناک شکست کو چھپانے " کے لیے کیا گیا ہے اور اس کے جواز پر سنگین سوالات اٹھائے ۔ اپنے واٹس ایپ چینل پر جاری ایک پیغام میں یادو نے حکمران جماعت پر طنز کرتے ہوئے کہاکہ "بی جے پی جھوٹ کی سون پاپڑی کی طرح ہے -جھوٹ پر جھوٹ کی تہیں چڑھی ہوئی ہیں۔" انہوں نے کہا کہ دوبارہ ووٹنگ کا فیصلہ انتخابی ناکامی کے بعد بہانے تراشنے کی کوشش ہے ۔ یہ بیان اس وقت سامنے آیا جب الیکشن کمیشن آف انڈیا نے 144-فالتا اسمبلی حلقے کے تمام 285 پولنگ اسٹیشنز پر مکمل دوبارہ ووٹنگ کا حکم دیا، جس کی وجہ "سنگین انتخابی بے ضابطگیاں" اور 29 اپریل 2026 کو ہونے والی ووٹنگ کے دوران جمہوری عمل میں مبینہ خلل کو قرار دیا گیا۔ یہ فیصلہ میڈیا رپورٹس اور ٹی وی فوٹیج کی بنیاد پر کیا گیا، جن میں ووٹنگ کے دوران بے قاعدگیوں کی نشاندہی کی گئی تھی۔ اس بنیاد پر سوال اٹھاتے ہوئے یادو نے کہاکہ"الیکشن کمیشن نے یہ فیصلہ میڈیا رپورٹس اور ٹی وی نشریات کی بنیاد پر لیا ہے ۔ لوگ پوچھ رہے ہیں کہ کیا اس کا مطلب ہے کہ میڈیا کو پولنگ بوتھ کے اندر رسائی حاصل تھی؟ یہ قواعد کے تحت ممکن نہیں-خاص طور پر جب ہر بوتھ کو مرکزی فورسز کی تعیناتی کے ساتھ ایک محفوظ علاقے میں تبدیل کر دیا گیا تھا۔"

Source: UNI NEWS