اگر بہار اسمبلی انتخاب میں این ڈی اے کو شکست کا سامنا کرنا پڑتا ہے، تو کوئی حیرت نہیں ہوگی: شرد پوار

نیشنلسٹ کانگریس پارٹی شرد چندر پوار (این سی پی-ایس پی) کے صدر شرد پوار ہفتہ کو بہار پہنچے۔ اس دوران انہوں نے نامہ نگاروں سے بات کرتے ہوئے کہا کہ ’’اگر بہار اسمبلی انتخاب میں بی جے پی اور این ڈی اے کی شکست ہوتی ہے تو اس میں کوئی حیرت کی بات نہیں ہے۔ کیونکہ اس ریاست کے لوگ تبدیلی چاہتے ہیں اور اس بار یہ ہو کر رہے گی۔‘‘ شرد پوارا کا کہنا ہے کہ بہار ملک کی دیگر ریاستوں سے الگ ہے اور یہ ہندوستانی سیاست کے کچھ فیصلہ کن لمحوں کا گواہ بھی رہا ہے۔ انہوں نے یہ بھی کہا کہ میں نے بہار اسمبلی کے انتخابی مہم میں حصہ نہیں لیا، لیکن مختلف ذرائع سے ملی خبر کے مطابق اگر این ڈی اے اقتدار کھو دیتی ہے تو مجھے کوئی تعجب نہیں ہوگا۔ شرد پوار نے بہار کے حوالے سے کہا کہ ’’یہ ایک غریب ریاست ہے، لیکن یہاں کے لوگ سیاسی طور پر کافی بیدار ہیں۔ جدوجہد آزادی کے دوران چمپارن میں مہاتما گاندھی کی تحریک، ایمرجنسی کے خلاف جے پرکاش نارائن کی تحریک اور اپوزیشن میں رہتے ہوئے اندرا گاندھی کا ہاتھی پر سوار ہو کر بیلچھی کا دورہ کرنا، ہندوستانی سیاست کا فیصلہ کن لمحہ ہے۔‘‘ شرد پوار نے ووٹر لسٹ میں بے ضابطگیوں کو لے کر لوگوں میں بیداری پیدا کرنے کے لیے لوک سبھا میں حزب اختلاف کے رہنما راہل گاندھی کی تعریف کی۔ انہوں نے کہا کہ الیکشن کمیشن آف انڈیا (ای سی آئی) کو کانگریس لیڈر کی شکایتوں پر توجہ دینی چاہیے اور اس کے مطابق کاررائی کی جانی چاہیے۔ ساتھ ہی انہوں نے کہا کہ یہ معاملہ آج سے نہیں، بلکہ کافی وقت سے چلا آ رہا ہے۔ اس کے بعد بھی اگر کوئی متعلقہ افسر توجہ نہیں دے رہا ہے تو یہ سنگین مسئلہ ہے۔

Source: social media