’’آج نہیں تو کل یہ ہوگا ہی‘‘ راجہ سنگھ نے دیا بی جے پی میں واپسی کا اشارہ

حیدرآباد: گوشہ محل کے ایم ایل اے راجہ سنگھ نے ایک بار پھر واضح اشارہ دیا ہے کہ وہ بھارتیہ جنتا پارٹی (بی جے پی) میں واپس لوٹ سکتے ہیں۔ انہوں نے کہا کہ پارٹی میں واپسی محض وقت کی بات ہے اور بی جے پی ان کا “گھر” ہے۔ ان بیانات کے بعد ریاستی سیاست میں نئی گہماگہمی دیکھنے میں آ رہی ہے اور ان کی دوبارہ شمولیت کے بارے میں قیاس آرائیاں تیز ہو گئی ہیں۔ راجہ سنگھ نے خاندانی مثال دیتے ہوئے کہا کہ اگر چار بھائیوں میں سے ایک جھگڑے کے بعد گھر چھوڑ دے تو وہ ایک نہ ایک دن واپس ضرور آتا ہے۔ راجہ سنگھ کے مطابق اگر آج نہیں تو کل وہ گھر لوٹے گا، البتہ یہ کہنا مشکل ہے کہ وہ وقت کب آئے گا۔ خود کو بی جے پی کا سچا سپاہی قرار دیتے ہوئے راجہ سنگھ نے کہا کہ جیسے ہی دہلی یا ریاستی قیادت کی جانب سے فون آئے گا، وہ پارٹی میں واپس شامل ہو جائیں گے۔ راجہ سنگھ نے بتایا کہ یہ درخواست وہ پہلے بھی کر چکے ہیں اور اب دوبارہ دہرا رہے ہیں۔ راجہ سنگھ نے زور دیا کہ پارٹی کے ہر ایم ایل اے اور ایم پی کو اپنے حلقے میں کام کرنے کی آزادی ملنی چاہیے۔ ان کے بقول اسی آزادی کے ساتھ ہی بی جے پی مستقبل میں اقتدار میں آ سکتی ہے۔ راجہ سنگھ نے کہا کہ اگر قیادت کی جانب سے رابطہ ہوتا ہے تو ان کی صرف ایک ہی گزارش ہوگی—سینئر لیڈروں سے آزادیِ عمل۔ اس کے بعد وہ بی آر ایس، کانگریس اور ایم آئی ایم کے خلاف بھرپور سیاسی جدوجہد کریں گے۔ واضح رہے کہ راجہ سنگھ نے کچھ عرصہ قبل بی جے پی سے استعفیٰ دیا تھا اور تب سے کسی دوسری جماعت میں شامل نہیں ہوئے۔ تاہم سیاسی حلقوں میں یہ بات زیرِ گردش ہے کہ اعلیٰ قیادت کے ساتھ بات چیت مثبت رہی ہے اور امکان ہے کہ وہ ایک ماہ کے اندر پارٹی میں باضابطہ واپسی کر لیں۔ موجودہ بیان کو اسی تناظر میں اہم اور چونکا دینے والا قرار دیا جا رہا ہے۔

Source: social media