اٹاوہ میں مزارپرعرس کی اجازت نہیں

اٹاوہ 30 جنوری: اترپردیش کے ضلع اٹاوہ میں فشرون علاقہ میں واقع شمس الدین کے مزار کے معاملے میں ضلع انتظامیہ نے 2 فروری کو مجوزہ عرس کے انعقاد کی اجازت دینے سے انکار کر دیا ہے ۔ انتظامیہ نے واضح کیا ہے کہ زمین سے متعلق معاملے کے تصفیے تک کسی بھی طرح کے پروگرام کی اجازت نہیں دی جائے گی۔ سرکاری ذرائع کے مطابق مزار کی دیکھ بھال کرنے والے فتح الٰہی کو محکمہ جنگلات کی جانب سے زمین سے متعلق دستاویزات 22 جنوری تک پیش کرنے کا نوٹس دیا گیا تھا، تاہم مقررہ مدت گزرنے کے باوجود مطلوبہ ریکارڈ پیش نہیں کیا گیا۔ اسی دوران عرس کے انعقاد کی اجازت کے لیے سٹی مجسٹریٹ کو درخواست دی گئی تھی، جس پر پولیس، محکمہ جنگلات اور انٹیلی جنس محکمہ سے مشترکہ رپورٹ طلب کی گئی۔ محکمہ جنگلات نے مزار تک جانے والے راستے پر پانچ مقامات پربیریکیڈنگکر کے آمد و رفت محدود کر دی ہے اور علاقے میں نگرانی بڑھا دی گئی ہے ۔ اس کے باوجود کچھ افراد عقیدت کے لیے وہاں پہنچتے دیکھے گئے ۔ مقامی سطح پر عرس منسوخ ہونے سے مایوسی کا ماحول ہے ۔ ضلع جنگلات افسر وکاس نائیک نے بتایا کہ نوٹس کے جواب کا انتظار کیا جا رہا ہے ۔ جواب موصول ہونے کے بعد قانونی عمل کے تحت آگے کی کارروائی کی جائے گی۔ انتظامیہ نے کہا ہے کہ ریزرو جنگلاتی رینج میں کسی بھی غیر قانونی تعمیر یا تقریب کی اجازت نہیں دی جائے گی۔

Source: UNI NEWS