پردھان منتری فصل بیمہ یوجنا میں کسانوں کے اندراج میں بنگال دوسرے نمبر پر: شوبھندو کا دعویٰ
پردھان منتری فصل بیمہ یوجنا میں کسانوں کے اندراج کے معاملے میں بنگال دوسرے مقام پر پہنچ گیا ہے۔ سیلاب اور قدرتی آفات کی صورتحال میں کسانوں کے پریمیم کا بڑا حصہ ریاستی حکومت اپنے بجٹ سے برداشت کر رہی ہے۔ مجموعی طور پر 32 لاکھ کسانوں کو اس بیمہ اسکیم کے دائرے میں لایا گیا ہے۔ اس کے ساتھ ہی اگست کے سیلاب سے متاثرہ کسانوں کو جلد از جلد معاوضہ پہنچانے کے لیے بیمہ کمپنیوں کو فوری طور پر نقصانات کا جائزہ لینے کی ہدایت دی گئی ہے۔ ہفتے کی صبح ایک پوسٹ کے ذریعے وزیر اعلیٰ شوبھیندو ادھیکاری نے خود یہ اطلاع دی۔
15 ستمبر تک ریاست بھر میں کسانوں کے نام اس اسکیم کے تحت درج کیے گئے ہیں۔ سیلاب سے متاثرہ اضلاع میں بھی کسانوں کی بڑی تعداد میں رجسٹریشن ہوئی ہے۔ مشرقی مدنی پور میں 7.23 لاکھ کسان، مغربی مدنی پور میں 4.73 لاکھ کسان، ہوگلی میں 1.68 لاکھ کسان اور جھاڑگرام میں 42 ہزار کسانوں نے پردھان منتری فصل بیمہ یوجنا کے تحت اپنا نام درج کرایا ہے۔ سیلاب متاثرہ علاقوں کے کسانوں کی سہولت کے لیے اگست سے 15 ستمبر تک ہر گرام پنچایت کی سطح پر خصوصی کیمپ بھی لگائے گئے تھے۔
وزیر اعلیٰ شوبھیندو ادھیکاری نے مزید بتایا کہ کسانوں پر مالی بوجھ کم کرنے کے لیے قابل ادائیگی پریمیم کا بڑا حصہ ریاستی حکومت اپنے بجٹ سے ادا کر رہی ہے۔ ایک ہیکٹر (2.50 ایکڑ) تک زمین رکھنے والے کسانوں کو صرف ایک روپے کی علامتی رقم ادا کرنی ہوگی۔ جبکہ ایک سے دو ہیکٹر زمین رکھنے والے کسانوں کو فی ایکڑ 100 روپے ادا کرنے ہوں گے۔ باقی پریمیم کی رقم ریاستی حکومت ادا کرے گی۔
دوسری جانب اگست کے سیلاب سے متاثرہ کسانوں کو جلد معاوضہ پہنچانے کے لیے بیمہ کمپنیوں کو فوری طور پر ’مڈ سیزن ایڈورسٹی‘ (Mid-Season Adversity) کا جائزہ لینے کی ہدایت دی گئی ہے۔ اس کے علاوہ بینکوں کے ذریعے قرض لینے والے کسانوں کے اندراج کی آخری تاریخ بڑھا کر 30 ستمبر کردی گئی ہے۔
وزیر اعلیٰ شوبھیندو ادھیکاری نے فیس بک پوسٹ میں لکھا، ”سیلاب اور قدرتی آفات کی اس مشکل صورتحال میں ہمارے کسانوں کے ساتھ کھڑا ہونا حکومت کی اولین ترجیح ہے۔ 2019-20 میں ممتا بنرجی کی حکومت نے پردھان منتری فصل بیمہ یوجنا کے تحت کسانوں کے اندراج کا عمل روک دیا تھا۔ اس کے نتیجے میں مغربی بنگال کے کسان طویل عرصے تک مناسب تحفظ سے محروم رہے۔ تاہم ریاست میں بی جے پی حکومت کے اقتدار میں آنے کے بعد کسانوں کے مفاد کو سب سے زیادہ اہمیت دیتے ہوئے فصل بیمہ کی یہ سہولت دوبارہ شروع کی گئی ہے۔