جلپائی گوڑی میں ممتا نواز کونسلر کے گھر میں توڑ پھوڑ، فائرنگ کا الزام
جلپائی گوڑی میں بلدیاتی سیاست ایک بار پھر کشیدہ ہوگئی ہے۔ بلدیاتی بورڈ کی تشکیل کو لے کر جاری رسہ کشی کے درمیان ممتا نواز ترنمول کانگریس کے ایک کونسلر کے گھر کو نشانہ بنا کر فائرنگ کرنے کے الزام سے علاقے میں سنسنی پھیل گئی۔ ہفتے کی صبح تقریباً ساڑھے تین بجے شہر کے وارڈ نمبر 15 کے کونسلر اور چیئرمین کے عہدے کے ممکنہ امیدوار تپن بندیوپادھیائے کے گھر میں داخل ہوکر دھمکی دینے، توڑ پھوڑ کرنے اور فائرنگ کرنے کا الزام عائد کیا گیا ہے۔ الزام ہے کہ ترنمول کے ریتو دھڑے اور بی جے پی نے یہ حملہ کیا، تاہم دونوں نے الزامات کی تردید کی ہے۔
ترنمول کے کئی رہنما اور کونسلر ریتو برتا دھڑے میں شامل ہوچکے ہیں۔ ریتو دھڑے کے کونسلروں کے ایک گروپ کی عدم اعتماد کی تحریک کے بعد گزشتہ 27 اگست کو جلپائی گوڑی میونسپلٹی کے چیئرمین سائکت چٹرجی نے اپنے عہدے سے استعفیٰ دے دیا تھا۔ ممتا نواز دھڑے نے نیا بورڈ تشکیل دینے کا عمل شروع کیا، لیکن میونسپلٹی میں جاری تعطل ختم کرنے کے لیے بلدیاتی و شہری ترقی کے محکمے نے ایڈمنسٹریٹر مقرر کردیا۔ممتا نواز دھڑے نے اس فیصلے کو چیلنج کرتے ہوئے کلکتہ ہائی کورٹ سے رجوع کیا۔ عدالت کے فیصلے کے بعد دوبارہ بورڈ تشکیل دینے کا عمل شروع ہوا۔ الزام ہے کہ اسی عمل میں رکاوٹ ڈالنے کے لیے کونسلر کو دھمکیاں دی گئیں، گھر میں توڑ پھوڑ کی گئی اور فائرنگ کی گئی۔ممتا نواز کونسلروں نے واقعے کے سلسلے میں پولیس سے رجوع کیا ہے۔ بی جے پی نے بھی واقعے کی مذمت کی ہے۔