گیانیش کمار کو عہدے سے ہٹانے کا مطالبہ کرتے ہوئے ترنمول کانگریس اب سپریم کورٹ پہنچ گئی
چیف الیکشن کمشنر گیانیش کمار کی تقرری کے معاملے میں مرکزی حکومت کے خلاف ممتا بنرجی کی ترنمول کانگریس نے سپریم کورٹ سے رجوع کیا ہے۔ پارٹی نے مطالبہ کیا ہے کہ گیانیش کمار کو عہدے سے ہٹایا جائے۔ رکن پارلیمنٹ ڈولا سین کی جانب سے دائر مقدمے میں چیف الیکشن کمشنر کے ساتھ دو دیگر الیکشن کمشنروں، سکھبیر سنگھ سندھو اور وویک جوشی کو بھی فریق بنایا گیا ہے۔ امکان ہے کہ آئندہ ہفتے اس مقدمے کی سماعت ہوگی۔
اس سے پہلے بھی گیانیش کمار کے خلاف سپریم کورٹ میں مقدمہ دائر کیا جا چکا ہے۔ اس کی بنیاد ’دی انڈین ایکسپریس‘ کی ایک رپورٹ تھی۔ رپورٹ میں دعویٰ کیا گیا تھا کہ گزشتہ 10 ماہ کے دوران دونوں الیکشن کمشنروں، وویک جوشی اور سکھبیر سنگھ سندھو نے کمیشن کے نام پر لیے گئے مختلف فیصلوں اور جاری کردہ ہدایات پر 14 مرتبہ تحریری طور پر اعتراض کیا تھا۔
گزشتہ ماہ ایک وکیل نے اس معاملے پر سپریم کورٹ میں مفاد عامہ کی عرضی دائر کی تھی۔ اس میں مطالبہ کیا گیا تھا کہ اپنے دونوں ساتھیوں کو نظرانداز کرتے ہوئے گیانیش کمار نے جو یک طرفہ فیصلے کیے، رہنما اصول جاری کیے اور سافٹ ویئر میں جو تبدیلیاں کیں، انہیں غیر آئینی قرار دے کر منسوخ کیا جائے۔
عرضی گزار نے پرانے فارم-6 کو دوبارہ نافذ کرنے کا مطالبہ بھی کیا تھا۔ اسی فارم کے ذریعے نئے ووٹر اپنا نام ووٹر لسٹ میں درج کراتے ہیں۔ الزام ہے کہ ووٹر لسٹ کی خصوصی گہری نظرثانی (ایس آئی آر) کے دوران اس فارم میں نئے سوالات شامل کیے گئے تھے۔ اپوزیشن کا دعویٰ ہے کہ قواعد میں ترمیم کیے بغیر فارم-6 میں کوئی تبدیلی نہیں کی جا سکتی۔ تاہم، ستمبر کے آخر میں الیکشن کمیشن نے اس فارم میں تبدیلی کی تھی۔ جن 13 ریاستوں میں ایس آئی آر کا عمل مکمل ہو چکا ہے، وہاں فارم-6 کے ذریعے درخواست دینے والوں کو اب ایس آئی آر سے متعلق معلومات فراہم نہیں کرنی پڑ رہی ہیں۔
’دی انڈین ایکسپریس‘ کی رپورٹ سامنے آنے کے بعد اپوزیشن جماعتوں نے گیانیش کمار سے استعفے اور یہاں تک کہ ان کی گرفتاری کا مطالبہ بھی کیا ہے۔ اپوزیشن اتحاد ’انڈیا‘ مسلسل ان کے خلاف احتجاج کر رہا ہے۔ اپوزیشن جماعتیں گیانیش کمار کو عہدے سے ہٹانے کے لیے ایک بار پھر پارلیمنٹ میں مواخذے کی تحریک پیش کرنے کی تیاری کر رہی ہیں۔
جمعرات کو جب لوک سبھا کے اسپیکر اوم برلا سے اس سلسلے میں ممکنہ اقدامات کے بارے میں پوچھا گیا تو انہوں نے کہا، ”مواخذے کی تحریک پیش کرنے کے لیے ایک مخصوص آئینی طریق? کار موجود ہے۔ پارلیمنٹ میں تحریک پیش کیے جانے کے بعد اسی کے مطابق کارروائی کی جائے گی۔“