’اپنے ہی اسمبلی حلقے میں نہیں جا پا رہی ہوں“، کیش پور کی رکن اسمبلی شیولی ساہا کا اظہارِ برہمی
اپنے ہی اسمبلی حلقے میں جانے سے قاصر ہونے کا دعویٰ کرتے ہوئے کیش پور کی رکن اسمبلی شیولی ساہا نے شدید ناراضگی کا اظہار کیا ہے۔ گزشتہ 15 برسوں سے کیش پور کی رکن اسمبلی کی حیثیت سے ذمہ داری نبھانے کے باوجود اس سال درگا پوجا کے دوران وہ اپنے حلقے کے کسی بھی پوجا پنڈال میں نہیں جا سکیں۔ اس پر انہوں نے شدید ذہنی تکلیف اور ناراضگی ظاہر کی۔ جمعہ کو ترنمول بھون میں منعقدہ ایک میٹنگ کے بعد میڈیا سے بات کرتے ہوئے انہوں نے اپنے غصے کا اظہار کیا۔ کیش پور کی رکن اسمبلی نے رت برت بنرجی کی قیادت والی ترنمول کانگریس کی قانون ساز پارٹی کے تئیں اپنی ناراضگی بھی ظاہر کی۔
شیولی نے کہا، ”الیکشن کمیشن نے مجھے جیت کا سرٹیفکیٹ تو دیا، لیکن اس کے باوجود میں آزادانہ طور پر کیش پور میں داخل نہیں ہو سکی۔“ انہوں نے مزید کہا، ”وزیر اعلیٰ کے ایک پروگرام میں شرکت کے لیے جب میں کیش پور گئی تو مجھے سب کے سامنے بے عزت کرکے وہاں سے نکال دیا گیا۔“ بعد میں ایک دوسرے پروگرام میں شرکت کے لیے جانے پر بھی انہیں اسی طرح کی ناخوشگوار صورتحال کا سامنا کرنا پڑا۔ ان کا الزام ہے کہ ان واقعات کے دوران انہیں مقامی انتظامیہ، پولیس یا انتظامیہ کی کسی دوسری سطح سے کوئی مدد نہیں ملی۔
سیاسی حلقوں کے ایک طبقے کی تشریح کے مطابق، حال ہی میں وزیر اعلیٰ شوبھندو ادھیکاری نے دعویٰ کیا تھا کہ بی جے پی کے 209 ارکان اسمبلی کے علاوہ مزید 64 ارکان اسمبلی بھی ایوان کے اندر ان کی حمایت میں ہاتھ اٹھانے کے لیے تیار ہیں۔ اس بیان کے بعد رت برت خیمے پر دباو¿ بڑھ گیا ہے۔ سیاسی حلقوں کے ایک طبقے کا خیال ہے کہ وزیر اعلیٰ کے بیان کی مخالفت کیے بغیر اس طرح یہ ظاہر کرنے کی کوشش کی جا رہی ہے کہ بی جے پی کے دورِ حکومت میں رت برت خیمے کے ارکان اسمبلی اپنے فرائض انجام نہیں دے پا رہے ہیں۔
اپنے 15 سالہ سیاسی سفر میں پہلی مرتبہ درگا پوجا کے دوران اپنے ہی اسمبلی حلقے کے کسی پنڈال میں داخل نہ ہو پانے پر بھی شیولی نے افسوس کا اظہار کیا۔ ان کا کہنا ہے کہ وہ اس ”ذہنی اذیت“ کو مزید برداشت نہیں کر سکیں، اسی لیے آج انہوں نے کھل کر اپنی ناراضگی ظاہر کی۔
سابق وزیر اعلیٰ ممتا بنرجی کو وجے دشمی کے موقع پر سلام کرنے کے لیے جانے کے سوال پر شیولی نے واضح کیا کہ انہوں نے جہاں سے بھی ممکن ہوا، دیدی کو سلام پیش کیا اور وجے دشمی کی مبارک باد دی۔ انہوں نے مزید کہا، ”ممتا بنرجی میری لیڈر ہیں اور اس حقیقت کے بدلنے کی کوئی گنجائش نہیں ہے۔“