نئی دہلی:لوک سبھا سکرٹریٹ نے ترنمول کانگریس کے 20 باغی اراکینِ پارلیمنٹ کو نوٹس جاری کرتے ہوئے، ابھیشیک بنرجی کی جانب سے دائر کی گئی نااہلی کی درخواستوں پر سات دنوں کے اندر اپنا جواب اور تبصرہ پیش کرنے کی ہدایت دی ہے۔

ان اراکین پر الزام ہے کہ انہوں نے ٹی ایم سی سے علیحدگی اختیار کر کے نیشنلسٹ سٹیزنز پارٹی آف انڈیا (NCPI) کا دامن تھام لیا ہے۔ ترنمول کانگریس نے اسے اپنی مرضی سے پارٹی کی رکنیت چھوڑنے کے مترادف قرار دیتے ہوئے انسدادِ دل بدلی قانون کے تحت نااہلی کی بنیاد بتایا ہے۔ دوسری جانب، باغی اراکین اپنے اس قدم کو آئینی طور پر جائز انضمام قرار دے رہے ہیں۔
25 اگست کو لوک سبھا سکرٹریٹ کے ڈائریکٹر کی جانب سے جاری کردہ ان نوٹسوں کے ساتھ ابھیشیک بنرجی کی 18 جون کی اصل درخواست کی کاپی بھی منسلک کی گئی ہے۔ یہ درخواست لوک سبھا کے ممبران کی دل بدلی کی بنیاد پر نااہلی کے قوانین (1985) کے قاعدہ 6 کے تحت داخل کی گئی تھی۔ یہ کارروائی سپریم کورٹ کی اس اہم سماعت کے فوراً بعد سامنے آئی ہے جس میں ابھیشیک بنرجی کی دائر کردہ درخواست پر فوری سماعت کی منظوری دی گئی تھی۔ اس درخواست میں سپیکر کے پاس زیرِ التواء نااہلی کی کارروائیوں پر جلد فیصلہ لینے کا مطالبہ کیا گیا تھا۔
چیف جسٹس سوریا کانت، جسٹس جوئے مالیہ باگچی اور جسٹس وی موہنا پر مشتمل بنچ نے اس معاملے کی سماعت کی۔ عدالتی کارروائی کے دوران سولسٹر جنرل تشر مہتا نے وضاحت کی کہ وہ لوک سبھا سپیکر اور جنرل سکرٹری کی نمائندگی کر رہے ہیں اور سپیکر کی جانب سے پہلے ہی نوٹس جاری کیے جا چکے ہیں۔
یہ تنازع اس وقت شروع ہوا جب ٹی ایم سی کے 20 لوک سبھا اراکین نے پارٹی پالیسی کے خلاف بغاوت کرتے ہوئے اعلان کیا کہ وہ 'نیشنلسٹ سٹیزنز پارٹی آف انڈیا' (NCPI) میں شامل ہو گئے ہیں۔ ان اراکین نے ایوان میں ایک الگ گروپ کے طور پر شناخت کا مطالبہ بھی کیا تھا، جس کے بعد پارلیمنٹ میں ان کے بیٹھنے کا الگ انتظام کیا گیا اور وہ NDA کی پارلیمانی سرگرمیوں میں بھی حصہ لیتے رہے ہیں۔ ابھیشیک بنرجی نے 27 جولائی کو تحریری یاد دہانی بھیجی تھی اور 12 اگست کو سپیکر اوم برلا سے ملاقات کر کے بھی جلد فیصلے کا مطالبہ کیا تھا۔