شام کے عبوری صدر احمد الشرع سعودی عرب کے سرکاری دور ے کے بعد ترکیہ پہنچ گئے ہیں جہاں انہوں نے انقرہ میں صدر رجب طیب ایردوآن سے ملاقات کی ہے۔ آج منگل کو’ایکس‘ پلیٹ فارم پر شامی صدر کے آفیشل اکاؤنٹ نے 15 سال بعد شامی صدر کے ترکیہ کے پہلے دورے میں انقرہ پہنچنے کے کی تصدیق کی۔ ساتھ ہی ایک ویڈیو پوسٹ کی جس میں الشرع کو انقرہ پہنچنے کے بعد ایک قافلے کی شکل میں ایوان صدر کی طرف جاتے دیکھا جاسکتا ہے۔ ایک دوسری ٹویٹ میں الشرع کو صدر ایروآن سے مصافحہ کرتے دیکھا جا سکتا ہے۔ اس موقعے پر دونوں ممالک کے وزراء بھی موجود ہیں۔ توقع ہے کہ دونوں صدور کے درمیان ہونے والی بات چیت میں شام اور دونوں ممالک کے درمیان تعلقات سے متعلق بہت سے مسائل پر بات کی جائے گی۔ چار باخبر ذرائع، ایک شامی سکیورٹی اہلکار، دمشق میں موجود دو غیر ملکی سکیورٹی ذرائع اور ایک سینئر علاقائی انٹیلی جنس اہلکار نے بتایا کہ الشرع ایردوآن کے ساتھ ایک مشترکہ دفاعی معاہدے پر بات چیت کر رہے ہیں۔ شامی صدر وسطی شام میں ترکیہ کے فضائی اڈوں کے قیام پر بھی بات کریں گے۔ انہوں نے انکشاف کیا کہ ترکیہ کی نئی شامی فوج کو تربیت دینے کے معاملے پر بات چیت کی جائے گی۔ علاقائی انٹیلی جنس اہلکار شام کے سیکورٹی اہلکار اور دو غیر ملکی سیکورٹی ذرائع میں سے ایک نے کہا کہ بات چیت میں بدیہ کے نام سے مشہور صحرائی علاقے میں دو ترک فوجی اڈے قائم کرنا شامل ہے۔ انہوں نے بتایا کہ دونوں اڈے ترکیہ کو مستقبل میں کسی بھی حملے کی صورت میں شام کی فضائی حدود کا دفاع کرنے کی اجازت دیں گے۔ شام کے ایک صدارتی عہدے دار نے وضاحت کی کہ الشرع ایردوآن کے ساتھ نئی فوج کے لیے ترک مسلح افواج کی تربیت، تعیناتی اور تعاون کے نئے شعبوں کے علاوہ دیگر امور پر تبادلہ خیال کریں گے۔

Source: social media