صدر ٹرمپ کو اب تک کتنی بار قتل کرنے کی کوشش یا دھمکیاں مل چکیں؟

واشنگٹن (26 اپریل ): امریکی صدر ڈونلڈ ٹرمپ کو گزشتہ سالوں میں متعدد بار قتل کی کوشش اور جان سے مارنے کی دھمکیاں دی گئیں۔ گزشتہ شب امریکی صدر ڈونلڈ ٹرمپ کی موجودگی میں وائٹ ہاؤس کریسپونڈنٹس ڈنر کے دوران اچانک ایک حملہ آور نے گھس کر فائرنگ کر دی، جس سے تقریب میں بھگدڑ مچ گئی۔ تقریب میں موجود امریکی صدر ڈونلڈ ٹرمپ، ان کی اہلیہ خاتون اوّل میلانیا، نائب صدر جے ڈی وینس اور کابینہ کے ارکان محفوظ رہے۔ تاہم یہ پہلا موقع نہیں جب صدر ٹرمپ کو قتل کرنے کی مبینہ کوشش کی گئی ہو۔ اس سے قبل بھی متعدد بار انہیں قتل کرنے کی کوششیں اور جان سے مارنے کی دھمکیوں کا سامنا کرنا پڑا ہے۔ گزشتہ شب ہونے والے فائرنگ واقعہ سے قبل جولائی 2024 میں ٹرمپ اس وقت قاتلانہ حملے میں بچے تھے، جب بٹلر، پنسلوانیا میں انتخابی ریلی سے خطاب کے دوران ان پر فائرنگ کی گئی تھی۔ اس واقعہ میں ٹرمپ کی جان بچ گئی تھی، تاہم کان زخمی ہوا تھا، جب کہ حملے میں ایک راہگیر مارا گیا تھا۔ ایجنٹوں اور سیکیورٹی اہلکاروں نے اسی وقت فائرنگ کرنے والے ملزم کروکس کو جائے وقوعہ پر گولی مار کر ہلاک کر دیا تھا۔ چند ماہ بعد، ستمبر 2024 میں ایک مسلح شخص فلوریڈا میں ٹرمپ کے ویسٹ پام بیچ گولف کورس کے قریب چھپ گیا تھا، حکام کے مطابق، مسلح شخص ٹرمپ کو قتل کرنے کے ارادے سے وہاں چھپا تھا۔ سیکریٹ سروس کے ایک ایجنٹ نے ٹرمپ پر فائرنگ کرنے سے پہلے روتھ کو دیکھا، اور اسے جلد ہی قریب سے گرفتار کر کے اس پر مقدمہ چلایا۔ عدالت میں استغاثہ کا کہنا تھا کہ ریان روتھ نے گولف کھیلتے ہوئے جھاڑیوں کے ذریعے رائفل کو نشانہ بنانے سے پہلے ہفتوں تک ٹرمپ کو مارنے کی منصوبہ بندی کی۔ روتھ کو گزشتہ سال صدر کو قتل کرنے کی کوشش کا مجرم پایا گیا تھا اور فروری میں اسے عمر قید کی سزا سنائی گئی تھی۔ اس کے علاوہ فروری میں 21 سالہ شخص آسٹن ٹکر مارٹن، فلوریڈا میں ٹرمپ کے مار-اے-لاگو ریزورٹ میں شاٹ گن سمیت داخل ہوا، تاہم اس وقت صدر ٹرمپ وہاں موجود نہیں تھے۔ سیکیورٹی اہلکاروں نے ملزم کو داخل ہوتے گولی مار دی تھی۔ اس سے قبل ستمبر 2020 میں ایک کینیڈین شہری نے ڈونلڈ ٹرمپ کو زہریلا خط بھیجا۔ جون 2016 میں لاس ویگاس میں 20 سالہ برطانوی شہری نے ٹرمپ ریلی میں پولیس اہلکارکا ہتھیار چھیننے کی کوشش کی۔ ستمبر 2017 میں نارتھ ڈکوٹا میں ایک شخص نے فورک لفٹ چوری کر کے صدارتی قافلے کی جانب بڑھنے کی کوشش کی۔ حملہ آور کا مقصد صدر کی گاڑی کو نقصان پہنچانا تھا۔

Source: social media