مائیکروسوفٹ کمپنی کے شریک بانی بل گیٹس کا کہنا ہے کہ عالمی سطح پر سعودی عرب جو عظیم کردار ادا کر رہا ہے وہ انسانیت کی علامت کی حیثیت سے مملکت کا مقام مضبوط بنا رہا ہے اور بین الاقوامی میدان میں اس کے قائدانہ کردار کا عکاس ہے۔ اس کردار میں صحت کے سیکٹر کی سپورٹ اور بچوں کے لیے انسداد پولیو فنڈ جیسے عالمی منصوبوں کے لیے رقوم کی فراہمی شامل ہے۔ اسی سلسلے میں بل گیٹس نے سعودی عرب کی مِسک فاؤنڈیشن اور بل ملنڈا فاؤنڈیشن کے درمیان تزویراتی شراکت داری کی تاسیس کا اعلان کیا۔ یہ اقدام مملکت اور خطے میں غیر منافع بخش سیکٹر میں نوجوانوں کی شرکت مضبوط بنائے گا۔ بل گیٹس نے یہ اعلان مِسک عالمی فورم کی سرگرمیوں میں شرکت کے دوران میں کیا۔ مذکورہ تزویراتی شراکت داری کا مقصد نوجوانوں کی حوصلہ افزائی کرنا ہے تا کہ وہ تعلیم اور شہریت کے عالمی معاملات میں جدت پر مبنی حل پیش کریں۔ بل گیٹس نے نوجوانوں کی سپورٹ اور انھیں با اختیار بنانے کے حوالے سے سعودی عرب کے قائدانہ کردار کو بھی سراہا۔ انھوں نے "مِسک عالمی فورم 2024" منصوبے کا خصوصی ذکر کیا جو نوجوانوں کی مہارتوں کو ترقی دینے اور ان میں جدت کی روح اجاگر کرنے سے متعلق ہے۔

Source: social media