اسرائیل کے عبرانی چینل 13 کی طرف سے کرائے گئے ایک سروے کے مطابق نصف اسرائیلیوں کا خیال ہے کہ امریکی صدر ڈونلڈ ٹرمپ وزیر اعظم بنجمن نیتن یاہو کے مقابلے غزہ کی پٹی میں قید افراد کی قسمت کے بارے میں "زیادہ فکر مند" ہیں۔ رائے عامہ کے ایک جائزے کے دوران جب ان سے پوچھا گیا کہ وہ امریکی صدر اوراسرائیلی وزیراعظم میں سے کس کو قیدیوں کے بارے میں زیادہ فکر مند دیکھے ر ہے ہیں تو 50 فیصد رائے دہندگان کا تھا کہ ٹرمپ انہیں قیدیوں کے معاملے میں زیادہ فکرمند دکھائی دیتے ہیں۔ 29 فیصد نے کہا کہ نیتن یاہو سب سے زیادہ فکر مند ہیں، جب کہ باقی شرکاء نے کوئی واضح رائے نہیں دی۔ ٹرمپ انتظامیہ نے غزہ کے معاہدے میں ثالثی کا کردار ادا کیا، جس نے اسرائیلی قیدیوں اور فلسطینی قیدیوں کے تبادلے کے بدلے پٹی پر پرتشدد اسرائیلی جنگ کا خاتمہ کیا۔ معاہدے کا پہلا مرحلہ تقریباً 10 روز قبل ختم ہو گیا تھا، جس کے دوران حماس نے متعدد قیدیوں کو رہا کیا تھا تاہم اسرائیل اس میں توسیع کا خواہاں ہے اور دوسرا مرحلہ شروع کرنے سے انکار کر رہا ہے، جس سے پورے معاہدے کو خطرہ لاحق ہو جائے گا۔ نیتن یاہو کو غزہ معاہدے کے مطالبے کے لیے کئی مہینوں سے جاری مظاہروں کا سامنا ہے، جب کہ انھیں انتہائی دائیں بازو کے دباؤ کا بھی سامنا ہے جس سے ان کی حکومت کو خطرہ ہے۔ منگل کو حماس نے زور دیا تھا کہ مصری اور قطری ثالثوں کی جانب سے جنگ بندی معاہدے پر عمل درآمد مکمل کرنے اور مذاکرات کا دوسرا مرحلہ شروع کرنے کی کوششیں جاری ہیں۔ اس مقصد کی جانب مثبت اشارے موجود ہیں۔ حماس کے ترجمان عبداللطیف القانوع نے ایک بیان میں کہاکہ "مصری اور قطری ثالثوں کی کوششیں جنگ بندی معاہدے پر عمل درآمد کو مکمل کرنے اور مذاکرات کا دوسرا مرحلہ شروع کرنے کے لیے جاری ہیں، اور اس کی طرف مثبت اشارے مل رہے ہیں"۔

Source: Social Media