ٹرمپ نے ایران کیخلاف ایک اور اعلان کر دیا

اسرائیلی ایما پر ایران پر جنگ مسلط کرنے والے امریکی صدر ڈونلڈ ٹرمپ نے ایران کے خلاف ایک اور اعلان کر دیا۔ صدر ٹرمپ نے کہا ہے کہ ایران کو جو بھی ملک ہتھیار فراہم کرے گا اس پر پابندیاں لگائیں گے، ایران کو ہتھیار فراہم کرنے والے ملک پر فوری طور پر 50فیصد ٹیرف لاگو ہو گا۔ انہوں نے کہا کہ ایران کو ہتھیار فراہم کرنے والے کسی ملک کو رعایت نہیں دی جائےگی۔ امریکی صدر ڈونلڈ ٹرمپ نے اپنے حالیہ بیان میں کہا ہے کہ عالمی امن کے حوالے سے آج کا دن انتہائی اہمیت کا حامل ہے۔ انہوں نے اعلان کیا کہ امریکا آبنائے ہرمز میں بحری ٹریفک کی بحالی اور اسے کھولنے میں بھرپور مدد فراہم کرے گا۔ صدر ٹرمپ کا کہنا تھا کہ خطے میں بہت سے مثبت اقدامات دیکھنے کو ملیں گے اور اب ایران اپنی تعمیر نو کا عمل شروع کر سکتا ہے۔ انہوں نے مزید کہا کہ یہ دور مشرق وسطیٰ کے لیے ایک سنہری دور ثابت ہو سکتا ہے۔ ان کے اس بیان کو خطے میں کشیدگی کے خاتمے اور معاشی استحکام کی جانب ایک بڑی پیش رفت قرار دیا جا رہا ہے۔ خیال رہے کہ امریکا اور ایران نے دو ہفتوں کی جنگ بندی پر اتفاق کیا ہے، پاکستان کی کوششوں کا بین الاقوامی سطح پر بھی اعتراف کیا جا رہا ہے جبکہ امریکی و ایرانی حکام نے بھی جنگ بندی کے لیے پاکستانی اقدامات کی تعریف کی ہے۔

Source: social media