ایران سے ڈیل ہو گئی تو میں اسلام آباد جا سکتا ہوں: صدر ٹرمپ کا اعلان

امریکہ کے صدر ڈونلڈ ٹرمپ نے دعویٰ کیا ہے کہ ’ایران اپنا افزودہ یورینیم امریکہ کے حوالے کرنے اور جوہری ہتھیار نہ بنانے پر رضامند ہو چکا ہے۔‘ وائٹ ہاؤس واشنگٹن میں رپورٹرز سے بات کرتے ہوئے امریکی صدر ڈونلڈ ٹرمپ نے کہا کہ ’ایران کے ساتھ کوئی بھی ڈیل اسے جوہری ہتھیار حاصل کرنے سے مستقل طور پر روک دے گی۔‘ انہوں نے اس حوالے سے مزید کہا کہ ’امریکہ ایران کے ساتھ معاہدے کے قریب پہنچ چکا ہے اور اگر پاکستان میں ڈیل پر دستخط ممکن ہوئے تو میں اسلام آباد جا سکتا ہوں۔‘ اسی گفتگو میں ان کا یہ بھی کہنا تھا کہ ’پاکستان نے بہت زبردست کردار ادا کیا ہے، پاکستان کے وزیراعظم اور فیلڈ مارشل زبردست شخصیات ہیں۔‘ صدر ٹرمپ نے کہا کہ ’ہم ایران کو اچھے طریقے سے ڈیل کر رہے ہیں، اچھا لگ رہا ہے کہ ہم ایران کے ساتھ معاہدہ کرنے جا رہے ہیں۔ ایران کے ساتھ مذاکرات کا دوسرا دور ہفتے کے آخر میں ہو سکتا ہے۔‘ انہوں نے کہا کہ اگر ایران کے ساتھ ڈیل نہ ہو سکی تو جنگ دوبارہ شروع ہونے کا خدشہ ہے۔ ’ایران جن باتوں پر پہلے تیار نہیں تھا اب تیار ہے، آبنائے ہرمز کی ناکہ بندی بمباری سے زیادہ موثر ثابت ہوئی۔ ایران کے ساتھ جنگ بندی میں توسیع کی ضرورت نہیں۔‘ ڈونلڈ ٹرمپ نے بتایا کہ ’لبنان اور اسرائیل کے درمیان 10 روز کے لیے جنگ بندی ہو چکی ہے جس میں حزب اللہ بھی شامل ہوگی۔‘ انہوں نے کہا کہ ’وہ جلد لبنان کے صدر جوزف عون اور اسرائیل کے وزیراعظم بنیامین نیتن یاہو کو ملاقات کے لیے وائٹ ہاؤس مدعو کریں گے۔‘ امریکی صدر ڈونلڈ ٹرمپ نے اس موقعے پر یہ بھی کہا کہ ’وہ اب تک دنیا میں 10 جنگیں رُکوا چکے ہیں۔‘

Source: social media