ہلدیہ میں 98 ایکڑ زمین پر پیپسی کا پلانٹ، ہرین گھاٹا میں کیمپا کولاکی فیکٹری قائم ہوگی
درگا پوجا کے بعد ہی مغربی بنگال میں کیمپا کولا بڑے پیمانے پر سرمایہ کاری کرنے جا رہی ہے۔ ریلائنس گروپ کلیانی کے ہریں گھاٹا میں اپنا پلانٹ قائم کرنے والا ہے۔ آئندہ 28 اکتوبر، بدھ کے روز اس پلانٹ کا سنگِ بنیاد رکھا جائے گا۔ چت±رتھی کے دن ہلدیہ سے وزیر اعلیٰ شوبھندو ادھیکاری نے یہ اعلان کیا۔ انہوں نے یہ بھی بتایا کہ ہلدیہ میں مزید دو پلانٹ قائم کیے جائیں گے۔ 98 ایکڑ زمین پر پیپسی کا پلانٹ لگایا جائے گا، جبکہ 50 ایکڑ زمین پر طبی آلات تیار کرنے کی فیکٹری قائم ہوگی۔
ریاست میں اقتدار کی تبدیلی کی اہم وجوہات میں سے ایک صنعتی سرگرمیوں کی کمی بھی تھی۔ بی جے پی نے وعدہ کیا تھا کہ اس کی حکومت بنگال کا کھویا ہوا وقار واپس لائے گی۔ وزیر اعلیٰ کے مطابق، ریاستی حکومت اسی مقصد کے تحت کام کر رہی ہے۔ اس سے پہلے لکس کوزی کی نئی فیکٹری اور امول کے پلانٹ کے قیام کا عمل شروع ہو چکا ہے۔ مشرقی مدنی پور کے دادن پاتر باڑی میں ایک گہری بندرگاہ بھی تعمیر کی جائے گی۔
سرمایہ کاری لانے کے لیے وزیر اعلیٰ نے مکیش امبانی سے لے کر گوتم اڈانی تک کے ساتھ میٹنگیں کی ہیں۔ اڈانی گروپ نیو ٹاو¿ن میں اسپتال تعمیر کر رہا ہے۔ اب وزیر اعلیٰ نے اعلان کیا ہے کہ ہریں گھاٹا میں کیمپا کولا کا پلانٹ قائم ہوگا، جبکہ ہلدیہ میں پیپسی سرمایہ کاری کرے گی۔
قابل ذکر ہے کہ چت±رتھی کے دن بنگال میں صنعتی شعبے میں نئی سرمایہ کاری کا اعلان کیا گیا۔ ہلدی ندی کے کنارے 6 ہزار کروڑ روپے کی سرمایہ کاری سے ایک نیا منصوبہ شروع کیا جا رہا ہے۔ بدھ کے روز وزیر اعلیٰ شوبھندو ادھیکاری نے ہلدیہ میں نئے فینول پلانٹ کا افتتاح کیا۔ فینول اور ایسیٹون تیار کرنے کا یہ مرکز ہلدیہ پیٹرو کیمیکلز لمیٹڈ کی مکمل ذیلی کمپنی ایڈپرما پرائیویٹ لمیٹڈ نے قائم کیا ہے۔
اس سرمایہ کاری سے ہلدیہ میں براہِ راست اور بالواسطہ طور پر روزگار کے مواقع پیدا ہوں گے۔ باخبر حلقوں کا خیال ہے کہ ہلدیہ ایک بار پھر سرمایہ کاری اور روزگار کے ایک اہم مرکز کے طور پر ابھرے گا۔
وزیر اعلیٰ نے اعلان کیا کہ ہلدیہ میں مزدوروں کی سہولت کے لیے جون 2027 میں ٹراما سینٹر کا افتتاح کیا جائے گا۔ اسی موقع پر انہوں نے ہلدیہ میں مزید دو پلانٹ قائم کرنے کا اعلان بھی کیا۔ ان میں سے ایک میں پیپسی سرمایہ کاری کرے گی، جبکہ دوسرے میں طبی آلات تیار کیے جائیں گے۔ دوسری جانب، نادیہ ضلع کے ہریں گھاٹا میں کیمپا کولا کا پلانٹ قائم کیا جائے گا۔