پابندِ سلاسل،گھٹنے ٹیکنےپرمجبور:اسرائیلی وزیرنےفلوٹیلا کےنظربند کارکنان کی وڈیو پوسٹ کر دی

اسرائیل کے انتہائی دائیں بازو کے وزیر برائے قومی سلامتی اتمار بین گویر نے بدھ کے روز ایک ویڈیو پوسٹ کی ہے جس میں غزہ جانے والے فلوٹیلا سے حراست میں لیے گئے کارکنان کو دکھایا گیا ہے جس میں ان کے ہاتھ کمر پر بندھے ہوئے اور وہ گھٹنوں کے بل اپنی پیشانی زمین پر رکھے ہوئے ہیں۔ بین گویر کے ایکس اکاؤنٹ پر شائع کردہ اور "اسرائیل میں خوش آمدید" کے عنوان والی فوٹیج میں درجنوں کارکنان کو اسرائیل میں ایک فوجی کشتی کے عرشے پر زیرِ حراست دکھایا گیا ہے جہاں وزیر اسرائیلی پرچم لہرا رہے ہیں جبکہ اسرائیلی ترانہ بہت بلند آواز میں بج رہا ہے۔ مذکورہ ویڈیو میں وزیر کے قریب سے گذرنے پر جب ایک کارکن کھڑے ہو کر "آزاد فلسطین" کا نعرہ لگاتا ہے تو حراستی مرکز کا عملہ اسے نیچے دھکیل دیتا ہے اور وزیر ان کی حوصلہ افزائی کرتے ہیں۔ لیکن اسرائیل کے وزیرِ خارجہ گیڈون سار نے ویڈیو جاری ہونے کے بعد بین گویر کی مذمت کی۔ سار نے ایکس پر کہا، "آپ نے دانستہ اس ذلت آمیز نمائش میں ہماری ریاست کو نقصان پہنچایا - اور ایسا پہلی بار نہیں ہوا۔ بین گویر 'اسرائیل کا چہرہ نہیں تھا'۔" قانونی حقوق کے مرکز عدلہ نے فوٹیج پر ردِ عمل ظاہر کرتے ہوئے ایک بیان میں کہا، "اسرائیل نے ان سرگرم کارکنان کے خلاف بدسلوکی اور تذلیل کی مجرمانہ پالیسی اپنا رکھی ہے جو فلسطینی عوام کے خلاف اسرائیل کے جاری جرائم کا مقابلہ کر رہے ہیں۔" عدلہ نے کہا کہ تنظیم کے وکلاء فلوٹیلا کے 430 سے زائد زیرِ حراست کارکنان سے ملنے کے لیے جنوبی اسرائیل کے حراستی مرکز گئے تھے۔

Source: social media