نیتن یاہو مشکل شخصیت ہیں، انہیں ہمارا شکر گزار ہونا چاہیے: ٹرمپ

امریکی صدر ڈونلڈ ٹرمپ نے اسرائیلی وزیرِاعظم بنیامین نیتن یاہو کو ’مشکل شخصیت‘ قرار دیتے ہوئے کہا ہے کہ انہیں امریکا کا شکر گزار ہونا چاہیے، کیونکہ ایران کو جوہری ہتھیار حاصل ہو جاتے تو اسرائیل کا وجود شدید خطرے میں پڑ سکتا تھا۔ امریکی اخبار نیویارک ٹائمز کو دیے گئے انٹرویو میں ایران کے ساتھ معاہدے کے اعلان کے بعد گفتگو کرتے ہوئے ٹرمپ نے نیتن یاہو کو لبنان پر حملوں کے حوالے سے تنقید کا نشانہ بنایا ہے۔ ان کا کہنا ہے کہ اسرائیلی کارروائیوں نے تقریباً اس معاہدے کو خطرے میں ڈال دیا تھا۔ ٹرمپ نے کہا ہے کہ نیتن یاہو بہت مشکل آدمی ہیں اور سچ کہوں تو ان کو ہمارا بہت شکر گزار ہونا چاہیے، اگر ایران کے پاس جوہری ہتھیار ہوتا تو اسرائیل 2 گھنٹے بھی برقرار نہ رہ پاتا۔ امریکی صدر نے ایران کو خبردار کرتے ہوئے کہا کہ اگر تہران کے جوہری پروگرام سے متعلق حتمی معاہدہ طے نہ پایا تو امریکا دوبارہ حملے کر سکتا ہے۔ انہوں نے دعویٰ کیا کہ ایران معاہدے پر آمادہ ہونے میں امریکی میزائل اور فضائی حملوں نے اہم کردار ادا کیا، ایران تیسرا حملہ نہیں چاہتا تھا، اسے اپنی بقا کی فکر تھی۔ ٹرمپ نے یہ بھی کہا کہ امریکا کی فوجی کارروائیوں نے معاہدے کی راہ ہموار کرنے میں بہت بڑا اثر ڈالا اور یہی دباؤ ایران کو مذاکرات کی میز تک لانے کا سبب بنا۔

Source: social media