نیشنز ہاکی کپ کے فائنل میں نیوزی لینڈ نے پاکستان کو باآسانی شکست دے کر ٹائٹل جیت لیا۔ ملائشیا کے دارلحکوت کوالالمپور کے نیشنل ہاکی سٹیڈیم میں کھیلے گئے فائنل مقابلے میں نیوزی لینڈ نے پاکستان کو دو کے مقابلے میں چھ گولز سے شکست دی۔ پہلے کوارٹر کے اختتام پر نیوزی لینڈ کو پاکستان کے خلاف صفر کے مقابلے میں دو گول کی برتری حاصل تھی۔ نیوزی لینڈ کی جانب سے کوسلیٹ سکاٹ نے پہلا جبکہ ہیہا سیم نے دوسرا گول سکور کیا۔ نیوزی لینڈ نے دوسرے کوارٹر کا آغاز 0-2 کی برتری کے ساتھ کیا لیکن ٹھامس ڈائلان، فنڈلے شان اور بوائیڈ سکاٹ نے ٹیم کی جانب سے گول کر کے کوارٹر کے اختتام تک برتری کو 0-5 تک بڑھا دیا۔ تیسرے کوارٹر کا آغاز نیوزی لینڈ نے 0-5 کی برتری کے ساتھ کیا تاہم پاکستان کے حیات ذکریا نے گول سکور کر کے ٹیم کا کھاتا کھولا اور برتری کو کم کیا۔ چوتھے کوارٹر میں نیوزی لینڈ کے کوسلیٹ نے میچ کا دوسرا انفرادی جبکہ ٹیم کا چھٹا گول سکور کیا جس کے بعد پاکستان نے پینالٹی کورنر پر میچ کا دوسرا گول سکور کیا۔ اس سے قبل ایونٹ کے پہلے سیمی فائنل میں پاکستان نے فرانس کو سنسنی خیز مقابلے کے بعد پنالٹی شوٹ آؤٹ پر شکست دیکر فائنل کے لیے کوالیفائی کیا تھا۔ ادھر نیوزی لینڈ نے کوریا کو دوسرے سیمی فائنل میں پنالٹی شوٹ آؤٹ پر ہرا کر فتح اپنے نام کی تھی۔

Source: social media