ناکام امریکی صدر نے ایک بار پھر ثابت کر دیا کہ وہ مذاکرات کے اصولوں کے پابند نہیں ہیں، ابراہیم عزیزی

ایرانی پارلیمنٹ کی قومی سلامتی اور خارجہ پالیسی کمیٹی کے سربراہ ابراہیم عزیزی نے کہا ہے کہ ناکام امریکی صدر نے ایک بار پھر ثابت کر دیا ہے کہ وہ نہ مذاکرات کے اصولوں کے پابند ہیں اور نہ ہی جنگ بندی کے معاہدے کا احترام کرتے ہیں۔ اپنے بیان میں ابراہیم عزیزی نے کہا کہ امریکا نے ایک مرتبہ پھر مذاکرات کے دوران ایران پر حملہ کیا، جنگ بندی کی یہ غیر ذمہ دارانہ خلاف ورزی امریکا کے لیے پسپائی اور پشیمانی کا باعث بنے گی۔ انہوں نے مزید کہا کہ الزام تراشی کا کھیل اب مزید نہیں چلے گا۔ اس سے قبل ایران کے سپریم لیڈر کے مشیر محسن رضائی نے کہا کہ امریکا نے آبنائے ہرمز میں کشیدگی پیدا کرکے مفاہمتی یادداشت کی خلاف ورزی کی ہے، مفاہمتی یادداشت کی کسی بھی خلاف ورزی کاجواب فوری اور فیصلہ کن انداز میں دیا جائے گا۔ خیال رہے کہ سوئٹزرلینڈ میں اسلام آباد مفاہمتی یادداشت کے بعد امریکا نے ایران پر حملہ کردیا۔ امریکی سینٹرل کمانڈ کا کہنا ہے کہ ہرمز میں ایران کی جانب سے ایک تجارتی جہاز پر حملے کے جواب میں فضائی حملہ کیا۔ ادھر ایرانی پاسدارانِ انقلاب کا کہنا ہے کہ امریکی افواج نے جزیرہ سرک پر حملہ کیا جسے ناکام بنا دیا گیا، خطے میں امریکی فوج کے متعدد ٹھکانوں کو نشانہ بنایا، امریکا کے کسی بھی نئے حملے کا فوری اور فیصلہ کن جواب دیا جائے گا۔

Source: SOCIAL MEDIA