سرکاری افسر کی پراسرار موت، دفتر کے ریسٹ روم سے ملی لاش!
دوپہر کو مقررہ وقت پر انہیں کھانا دیا گیا تھا۔ اس کے بعد وہ کچھ دیر آرام کرنے کے لیے دفتر کے ہی ریسٹ روم میں گئے تھے۔ بعد میں وہیں سے ان کی لاش برآمد ہوئی۔ آبپاشی محکمہ کے واٹر ٹیکس افسر کی موت سے درگاپور میں سنسنی پھیل گئی۔ متوفی افسر کا نام آلوک داس تھا۔ ان کی موت حادثاتی تھی، خودکشی یا کوئی اور معاملہ، اس حوالے سے سوال اٹھ رہے ہیں۔ پولیس نے واقعے کی تحقیقات شروع کر دی ہے۔
آلوک داس کا گھر نادیہ کے کلیانی میں تھا۔ ملازمت کے سلسلے میں وہ درگاپور میں رہتے تھے۔ جمعہ کو 52 سالہ آلوک داس حسب معمول دفتر گئے تھے۔ دوپہر کو دفتر میں کام کرنے کے بعد وہ ریسٹ روم میں چلے گئے۔ محکمہ کے ذرائع کے مطابق، ریسٹ روم میں رہتے ہوئے انہوں نے دوپہر کا کھانا بھی مانگا تھا۔ عملے نے وہیں انہیں کھانا پہنچایا۔ اس کے بعد سے کمرے کا دروازہ بند تھا۔
شام گزر کر رات ہوگئی، لیکن کمرے کا دروازہ بند ہی رہا اور ان سے رابطہ بھی نہیں ہو پا رہا تھا۔ رات کے وقت محکمہ کے سکیورٹی گارڈز کو تشویش ہوئی۔ متعدد مرتبہ فون کرنے کے باوجود آلوک داس نے فون نہیں اٹھایا۔ کمرے کے اندر سے بھی کوئی جواب نہیں مل رہا تھا۔ صورتحال کو دیکھتے ہوئے محکمہ کے اعلیٰ افسران کو اطلاع دی گئی۔ رات تک کوئی جواب نہ ملنے پر پولیس کو اطلاع دی گئی۔
کوک اوون تھانے کی پولیس موقع پر پہنچی اور کمرے کا دروازہ کھول کر اندر داخل ہوئی۔ اندر آلوک داس کو مردہ حالت میں پایا گیا۔ پولیس نے لاش کو فوری طور پر تحویل میں لے کر پوسٹ مارٹم کے لیے درگاپور سب ڈویڑنل اسپتال بھیج دیا۔
یہ واقعہ کیوں پیش آیا، اس کی وجہ ابھی واضح نہیں ہے۔ پولیس اس بات کی جانچ کر رہی ہے کہ موت کے پیچھے کوئی ذاتی وجہ، کام سے متعلق مسئلہ یا کوئی اور معاملہ تو نہیں تھا۔ تمام پہلوو¿ں کو مدنظر رکھتے ہوئے تحقیقات کی جا رہی ہیں۔ پوسٹ مارٹم رپورٹ آنے کے بعد موت کی اصل وجہ کے بارے میں مزید وضاحت ملنے کی امید ہے۔
آبپاشی محکمہ کے سکیورٹی گارڈ ارون یادو نے بتایا، ”دوپہر کو کھانا دینے کے بعد ان سے مزید کوئی رابطہ نہیں ہو سکا۔ رات کو کئی مرتبہ فون کیا، لیکن انہوں نے فون نہیں اٹھایا۔ بعد میں معلوم ہوا کہ ریسٹ روم میں ان کی موت ہو چکی ہے۔ موت کی وجہ کیا ہے، یہ میں نہیں سمجھ پا رہا ہوں۔ تاہم انہیں دیکھ کر کبھی ایسا محسوس نہیں ہوتا تھا کہ کوئی مسئلہ ہے۔“