متحدہ عرب امارات کا اوپیک اور اوپیک پلس سے علیحدگی کا اعلان

متحدہ عرب امارات نے اوپیک اور اوپیک پلس سے علیحدگی کا اعلان کر دیا۔ ابوظبی سے امارات نیوز ایجنسی کے مطابق فیصلہ یکم مئی 2026 سے نافذ العمل ہوگا۔ اماراتی حکام کے مطابق متحدہ عرب امارات آئل کی فروخت پالیسی میں خودمختاری حاصل کرے گا۔ امارات نیوز ایجنسی کے مطابق عالمی تیل مارکیٹ پر فیصلے کے اثرات متوقع ہیں۔ واضح رہے کہ تیل پیدا کرنے والے ممالک کی تنظیم اوپیک کا قیام 1960ء میں عمل میں آیا تھا۔ سعودی عرب، ایران، عراق اور کویت اوپیک کے اہم رکن ہیں۔ اوپیک پلس میں روس سمیت دیگر ممالک شامل ہیں۔ اوپیک اور اوپیک پلس آئل کی پیداوار اور قیمتوں کا تعین کرتے ہیں۔ تیل برآمد کرنے والے ممالک کی تنظیم اوپیک کا بنیادی مقصد عالمی تیل کی منڈی کو مستحکم رکھنا اور رکن ممالک کے مفادات کا تحفظ کرنا ہے۔ یہ تیل برآمد کرنے والے ان گروپوں اور ان کے غیر اعلانیہ قائد سعودی عرب کے لیے ایک بڑا دھچکا ہے، خاص کر ایک ایسے وقت میں جب ایران کی جنگ نے توانائی کے شعبے میں ایک تاریخی بحران پیدا کر دیا ہے اور عالمی معیشت کو غیر یقینی صورتحال سے دوچار کر دیا ہے۔ یاد رہے اوپیک پلس تیل پیدا کرنے والے ممالک کا ایک اتحاد ہے، جس میں اوپیک کے رکن ممالک کے ساتھ روس سمیت چند غیر اوپیک ممالک بھی شامل ہیں۔ اس اتحاد کا مقصد عالمی منڈی میں تیل کی پیداوار اور قیمتوں کو متوازن رکھنا ہے۔

Source: social media