کراچی میں ایک حملے میں چار رینجرزاہلکار جاں بحق، چھ حملہ آور دہشت گرد ہلاک

کراچی میں پاکستان رینجرز سندھ کے کیمپ پر حملہ کرنے والے 6 دہشتگردوں کو ہلاک اور ایک زخمی افغان دہشتگرد کو گرفتار کرلیا گیا۔ پاک فوج کے شعبہ تعلقات عامہ آئی ایس پی آر کے مطابق جماعت الاحرار کے خوارج نے کیمپ کے مرکزی گیٹ پر دھماکے کے بعد اندر داخل ہونے کی کوشش کی، جہاں فائرنگ کے تبادلے میں پاکستان رینجرز کے4 جوان شہید اور 4 زخمی ہوئے۔ دہشت گردوں نے رینجرز کی ایک گاڑی کو گلستان جوہر میں ایک بیریئر حملے کا نشانہ بنایا۔ گلستان جوہر میں سکیورٹی کی ذمہ داریوں میں رینجرز کی خدمات حاصل کی گئی ہیں۔ حملے کی ذمہ داری دہشت گرد گروہ جماعت الاحرار نے قبول کر لی ہے۔ جماعت الاحرار بڑی دہشت گرد تنظیم 'ٹی ٹی پی' کا ایک حصہ ہے، پاکستان پر 'ٹی ٹی پی' کے حملے افغانستان میں طالبان حکومت بحال ہونے کے بعد سے بڑھ گئے ہیں۔ 'ٹی ٹی پی' کی زیادہ کارروائیوں کا مرکز صوبہ خیبر پختونخوا رہا ہے۔ یہ گروہ سویلین آبادی اور سرکاری اہداف دونوں کویکساں طور پر نشانہ بناتا رہتا ہے۔ آئی ایس پی آر کے مطابق علاقے میں کلیئرنس آپریشن جاری ہے، عزمِ استحکام وژن کے تحت دہشتگردی کے مکمل خاتمے تک کارروائیاں جاری رہیں گی۔ فیلڈ مارشل سید عاصم منیر نے شہداء کو خراجِ عقیدت پیش کیا ہے اور لواحقین سے دلی تعزیت کا اظہار کیا ہے۔ دوسری جانب صدرِ مملکت آصف علی زرداری نے کہا ہے کہ دہشتگردی سے جنگ میں قوم اپنے بہادر سپاہیوں کی قربانیاں کبھی فراموش نہیں کرے گی، بیرونی سرپرستی میں سرگرم دہشتگرد عناصر کے مذموم عزائم کبھی کامیاب نہیں ہوں گے۔ پاکستان کے سب سے بڑے شہر اور تجارتی مرکز کراچی میں گذشتہ برسوں کے دوران عسکریت پسندوں کے متعدد حملے دیکھے گئے ہیں، جن میں سکیورٹی فورسز، سرکاری تنصیبات اور چینی مفادات کو نشانہ بنانے والے حملے شامل ہیں۔ اکتوبر 2024 میں شہر کے ایئرپورٹ کے قریب ہونے والے ایک خودکش دھماکے دو چینی شہری ہلاک اور دیگر 11 افراد زخمی ہوئے تھے۔ اس حملے کی ذمہ داری کالعدم تنظیم بلوچ لبریشن آرمی نے قبول کی تھی۔ حملے کے اگلے مہینے نومبر میں سندھ کے وزیرِ داخلہ ضیا الحسن النجار نے اس حملے میں ملوث دو افراد کی گرفتاری کی تصدیق کی تھی۔ اس سے قبل فروری 2023 میں شاہراہ فیصل پر واقع کراچی پولیس آفس پر مسلح شدت پسندوں نے حملہ کیا تھا جس کے نتیجے میں کم از کم چار افراد ہلاک ہوئے تھے۔ پولیس اور رینجرز نے اس حملے کے دوران تین عسکریت پسندوں کو ہلاک کرنے کی تصدیق کی تھی، جس کا تعلق کالعدم تحریک طالبان پاکستان سے تھا۔

Source: Social Media