کلکتہ:نیٹ اسکینڈل کے خلاف اور 'کاکروچ جنتا پارٹی' ( سی جے پی ) کی حمایت میں بائیں بازو کی طلبہ تنظیموں کا احتجاجی مارچ شدید بدامنی اور تشدد میں تبدیل ہو گیا۔ دھرم تلہ میں دھرنے کے دوران مظاہرین کے ایک طبقے اور ہجوم میں شامل بیرونی عناصر نے نہ صرف پولیس پر جوتے اور بوتلیں پھینکیں، بلکہ خبروں کی کوریج کرنے والے صحافیوں اور فوٹو جرنلسٹس پر بھی بدترین تشدد کیا۔ اس حملے میں شدید زخمی ہونے والے چار صحافی فی الحال ایس ایس کے ایم ہسپتال کے ٹراما کیئر سینٹر میں زیرِ علاج ہیں۔ جمعہ کی رات تقریباً وزیراعلیٰ شوبھندو ادھیکاری ہسپتال پہنچے اور ڈاکٹروں سے آدھے گھنٹے تک زخمیوں کی صحت اور علاج کا حال پوچھا۔ ہسپتال سے باہر آ کر انہوں نے حملے کے ذمہ داروں کو سخت وارننگ دیتے ہوئے کہا کہ"کچھ دن انتظار کریں، مجھے معلوم ہے کہ ان کے ساتھ کیا کرنا ہے۔ میں ان شرپسندوں کو سچائی دکھاو¿ں گا۔" شو بھندوو ادھیکاری کے بعد باغی ترنمول کانگریس کے رہنما ریتابرتا بنرجی نے بھی ہسپتال جا کر زخمیوں کی عیادت کی۔ انہوں نے صحافیوں پر تشدد کی شدید الفاظ میں مذمت کرتے ہوئے کہا کہ"یہ کسی صورت طلبہ کی تحریک نہیں ہے۔ دوسری جانب 'کاکروچ جنتا پارٹی' کی اس تحریک سے وابستہ ایک نمائندے نے الزام لگایا کہ پرامن جلوس میں کچھ 'غدار اور بدعنوان عناصر' گھس آئے تھے جنہوں نے پولیس اور میڈیا پر حملہ کیا۔ تحریک کے اہم منتظم ددیپیا گنگوپادھیائے نے اپنا موقف واضح کرتے ہوئے کہا کہ"اگر کوئی بدامنی یا جھگڑا چاہتا ہے تو اسے ہمارے احتجاج میں آنے کی ضرورت نہیں ہے۔ ہمیں یہ غنڈہ گردی اور تشدد ہرگز نہیں چاہیے۔ ہم اپنے مطالبات کے لیے پرامن جدوجہد جاری رکھیں گے۔" پولیس ذرائع کے مطابق میڈیا اور پولیس پر حملہ کرنے والے شرپسندوں کی شناخت کر لی گئی ہے اور ان کے خلاف جلد سخت قانونی کارروائی کی جائے گی۔

Source: Admin