کولکاتا: کولکاتا کے نیو مارکیٹ علاقے کی مرزا غالب اسٹریٹ میں واقع 'شیکھا ان' ہوٹل میں منگل کی دیر رات پیش آنے والے خوفناک آتشزدگی کے واقعے میں مزید دو افراد کی شناخت کے بعد ہلاکتوں کی کل تعداد 9 ہو گئی ہے، جن میں 7 بنگلہ دیشی اور 2 بھارتی شہری شامل ہیں۔ اس دردناک حادثے کی تحقیقات کے دوران فائر بریگیڈ اور پولیس انتظامیہ کی شدید لاپروائی اور سنگین بے ضابطگیاں سامنے آئی ہیں۔

اس افسوسناک واقعہ میں جہاں شلی گوڑی کے 68 سالہ جوگ نارائن اگروال اور جھارکھنڈ سے کولکاتا میں اپنی پہلی نوکری کرنے آئے 19 سالہ ریسیپشنسٹ سندیپ پاسوان جاں بحق ہوئے، وہیں علاج کی غرض سے آئے ایک ہی بنگلہ دیشی خاندان کے متعدد افراد اور ایک صحافی سمیت 7 بنگلہ دیشی شہری دھویں میں دم گھٹنے سے ہلاک ہو گئے۔

تفتیش کاروں کے مطابق، یہ حادثہ ہوٹل کی شدید بے ضابطگیوں کا نتیجہ تھا۔ محض 1100 مربع فٹ کی جگہ میں لکڑی کی فالس سیلنگ اور سلائیڈنگ دروازوں کا استعمال کرتے ہوئے 5 چھوٹے چھوٹے کمرے بنائے گئے تھے۔ شارٹ سرکٹ کے بعد اگنے والی آگ کا زہریلا دھواں لکڑی کی سیلنگ کے گیپ سے تمام کمروں میں پھیل گیا، جس سے سوئے ہوئے مسافروں کو نکلنے کا موقع نہ مل سکا۔

لال بازار کی خفیہ پولیس نے اس معاملے میں ابو ظفر نامی شخص کو اینٹالی مارکیٹ علاقے سے گرفتار کر لیا ہے۔ ابو ظفر نے یہ ہوٹل اپنی بیوی کے نام پر مالکانہ حقوق رکھنے والے بیریشور مترا سے 40,000 روپے ماہانہ لیز پر لیا تھا۔ فی الحال عدالت نے ابو ظفر کو 14 دن کی پولیس تحویل میں بھیج دیا ہے، جبکہ اصلی مالک بیریشور مترا اور ابو ظفر کی بیوی مفرور ہیں جن کی تلاش جاری ہے۔

فائر بریگیڈ ہیڈ کوارٹر سے محض چند قدم کی دوری پر بغیر فائر سیفٹی کے اتنے عرصے سے جاری اس غیر قانونی دھندے پر اب سوالات اٹھ رہے ہیں۔ واقعے کے بعد فائر بریگیڈ نے مرزا غالب اسٹریٹ کے 9 ہوٹلوں اور 4 ریستورانوں کو وجہ بتاؤ نوٹس جاری کرتے ہوئے 24 گھنٹے کے اندر جواب طلب کیا ہے، اور تسلی بخش جواب نہ ملنے پر انہیں سیل کرنے کا انتباہ دیا ہے۔

Source: Admin