خلیجی تعاون کونسل کا سلامتی کونسل سے ایران کے حملے رکوانے اور سمندری راستوں کے تحفظ کا مطالبہ

خلیجی تعاون کونسل کے سیکریٹری جنرل جاسم البدیوی نے اقوامِ متحدہ کی سلامتی کونسل سے مطالبہ کیا ہے کہ وہ فوری اقدامات کرتے ہوئے ایران کے علاقائی حملوں کو رکوائے اور خلیجی آبی گزرگاہوں میں بلا تعطل جہاز رانی کو یقینی بنائے۔ سلامتی کونسل کے اجلاس سے خطاب کرتے ہوئے جاسم البدیوی نے ایرانی حملوں کو بین الاقوامی قانون اور اقوامِ متحدہ کے چارٹر کی کھلی خلاف ورزی قرار دیا۔ ان کا کہنا ہے کہ کونسل تمام ضروری اقدامات کرے تاکہ خطے میں سلامتی بحال ہو اور فضائی و سمندری راستے محفوظ رہیں۔ جاسم البدیوی نے زور دیا کہ ایران سے متعلق کسی بھی مذاکرات یا معاہدے میں خلیجی تعاون کونسل کے تمام 6 رکن ممالک سعودی عرب، قطر، بحرین، عمان، کویت اور متحدہ عرب امارات کو شامل کیا جائے تاکہ مستقبل میں کشیدگی اور حملوں کو روکا جا سکے۔ اُنہوں نے کہا کہ فوری طور پر حملے بند کرنا، خطے میں استحکام بحال کرنا، عالمی سپلائی چینز کا تحفظ اور توانائی کی منڈیوں کو محفوظ بنانا انتہائی ضروری ہے۔ واضح رہے کہ ایران نے 28 فروری سے امریکا اور اسرائیل کی جانب سے شروع ہونے والی جنگ کے بعد مشرقِ وسطیٰ میں روزانہ کی بنیاد پر میزائل اور ڈرون حملے شروع کر دیے تھے۔ ایرانی حکام کا مؤقف ہے کہ یہ کارروائیاں دفاع کے تحت امریکی اور اسرائیلی مفادات کو نشانہ بنانے کے لیے کی جا رہی ہیں۔

Source: social media