موہن بگان کا ممبرشپ کارڈ ہو تو پنڈال میں وی آئی پی انٹری، کولکاتا کے اس پوجا پنڈال کی جانب سے بڑا سرپرائز
کولکاتا کے اس مشرقی بنگالی باشندے کے لیے فٹ بال سب سے پسندیدہ کھیل ہے، جبکہ درگا پوجا سب سے پسندیدہ تہوار۔ اگر دونوں ایک ساتھ مل جائیں تو کیا ہی بات ہے! یعنی سونے پر سہاگہ۔ آپ سوچ رہے ہوں گے کہ کیا یہ محض خیالی باتیں ہیں؟ بالکل نہیں۔ اس بار کولکاتا کے چورباگان سروَجَنِن کے درگا پوجا پنڈال میں کھیل اور درگا پوجا حقیقت میں ایک دوسرے کے ساتھ گھل مل جائیں گے۔ اس کی وجہ یہ ہے کہ موہن بگان کا ممبرشپ کارڈ رکھنے والے افراد کو پنڈال میں ’وی آئی پی انٹری‘ کی سہولت ملے گی۔
بات ہو رہی ہے چورباگان سروَجَنِن درگا پوجا کی۔ اس بار اس پنڈال میں موہن بگان رتن سے سرفراز مرحوم ٹوٹو بوس کو خصوصی خراجِ عقیدت پیش کیا جائے گا۔ پوجا منتظمین نے جمعہ کو سوشل میڈیا پر اس کا اعلان کیا۔ موہن بگان کا ممبر ہونے کی صورت میں 16 اکتوبر، ششٹھی سے 21 اکتوبر، دشمی تک پنڈال میں ’وی آئی پی‘ کی حیثیت سے داخلہ لیا جا سکے گا۔ موہن بگان کا ہر ممبر اپنے ساتھ زیادہ سے زیادہ تین افراد کو پنڈال میں لے جا سکے گا۔ایک طرف جمعرات کو ہی موہن بگان نے آئی ایف اے شیلڈ جیتی، جس سے کلب کے ممبران میں زبردست جوش و خروش ہے۔ دوسری طرف پنڈال میں وی آئی پی انٹری پاس کی سہولت کی خبر نے بھی موہن بگان کے ممبران کو خوش کر دیا ہے۔چورباگان سروَجَنِن کولکاتا کی مقبول درگا پوجاو¿ں میں سے ایک ہے۔ ہر سال منتظمین مختلف موضوعات پر مبنی پنڈال تیار کرکے عام لوگوں کو حیران کرتے ہیں۔ اسی لیے تقریباً ہر شخص کو اس پوجا پنڈال کو دیکھنے کا انتظار رہتا ہے۔
تاہم، اس سال پوجا کی تیاریوں کو لے کر اختلافات اور افراتفری کی صورتِ حال پیدا ہو گئی تھی۔ یہاں دو مرتبہ کھونٹی پوجا بھی کی گئی۔ اس معاملے پر چورباگان سروَجَنِن پوجا کمیٹی کے سکریٹری راج کمار سیودا نے پہلے بتایا تھا، ”تقریباً دو سال پہلے کارتک بنرجی نے اپنا اثر و رسوخ استعمال کرتے ہوئے میونسپل کارپوریشن کی زمین پر قبضہ کرکے کلب قائم کیا تھا۔ اس سے محلے کے لوگوں کو بھی پریشانی ہوئی۔ میونسپل کارپوریشن اور پولیس کی جانب سے بار بار نوٹس دیے گئے، لیکن کارتک بنرجی نے اپنے اثر و رسوخ کا استعمال کرتے ہوئے کلب کو برقرار رکھا۔“
تاہم، بی جے پی حکومت کے دور میں صورتِ حال بدل گئی۔ راج کمار بابو نے بتایا، ”نئی حکومت آنے کے بعد اس غیر قانونی کلب کو توڑنے کا نوٹس دیا گیا۔ 20 جون کو اسے منہدم کرنے کا نوٹس جاری کیا گیا تھا۔ نوٹس ملتے ہی 5 جون کو کھونٹی پوجا کر دی گئی۔“لیکن ان کا دعویٰ ہے کہ اس دن کھونٹی پوجا کے دوران ضابطوں کی پابندی نہیں کی گئی۔ انہوں نے بتایا کہ عام طور پر شمال مشرقی سمت، یعنی ایشان کونے میں کھونٹی پوجا کی جاتی ہے، لیکن اس روایت پر عمل نہیں کیا گیا۔ اسی وجہ سے فنکار کے مشورے سے دوسری مرتبہ کھونٹی پوجا کا اہتمام کیا گیا۔کمیٹی میں تبدیلی کے ساتھ ہی فنکار بھی تبدیل ہو گئے ہیں۔ اس بار پہلی مرتبہ سوشانت شیوانی پال کو چورباگان کے پنڈال کی تھیم سجاوٹ کی ذمہ داری سونپی گئی ہے۔ اب دیکھنا یہ ہے کہ اس سال یہ پنڈال اپنے حسن اور منفرد انداز سے ناظرین کو کس حد تک حیران کر پاتا ہے۔