حجاج کرام نے ایام تشریق کے آخری دن جمرات کو کنکریاں ماریں، منی کو الوداع

بیت اللہ شریف کے حجاج کرام نے ہفتہ کے روز ایام تشریق کے تیسرے دن اور حج کے چھٹے اختیاری دن جمرات کو کنکریاں ماریں اور اپنے مناسک حج کا اختتام کرلیا۔ بڑی تعداد میں حجاج کرام عید کے تیسرے دن ہی منیٰ سے نکل گئے تھے۔ منیٰ میں باقی رہ جانے والے حجاج کرام نے 13 ذو الحج کو تینوں جمرات کو کنکریاں ماریں۔ رمی جمار کا کا آغاز جمرہ صغریٰ سے ہوا۔ پھر وسطیٰ اور آخر میں جمرہ عقبہ کو کنکریاں ماری گئیں ۔ نبی کریم صلی اللہ علیہ وسلم کی سنت کی پیروی کرتے حجاج کرام نے رمی جمار کی۔ یہ سب ایسے ایمانی ماحول میں ہوا جو سکون و اطمینان سے لبریز تھا۔ جمرات کی عمارت میں صبح سویرے سے ہی حجاج کرام کی آمد و رفت میں بڑی روانی دیکھنے میں آئی۔ اس کی وجہ گروپ بندی کے منصوبے اور مربوط فیلڈ آرگنائزیشن تھی۔ ضیوف الرحمن کے لیے کنکریاں مارنے کے راستوں اور عمارت کے راستوں کے درمیان ایک جدید آپریٹنگ سسٹم کے تحت آمد و رفت کو آسان بنایا گیا تھا۔ اس سسٹم میں مجمع کی کثافت اور گروپ بندی کے اوقات کا خیال رکھا گیا تھا۔ جمرات کی عمارت کے ارد گرد سکیورٹی، صحت اور خدمات کی کوششیں مربوط تھیں۔ فیلڈ ٹیموں، رہنمائی مراکز اور ایمبولینس خدمات موجود تھیں۔ اس انتظام نے حفاظت کی سطح کو بڑھا دیا تھا اور مناسک ادا کرنے کے دوران حجاج کو فراہم کی جانے والی خدمات کے معیار کو بلند کردیا تھا۔ ایام تشریق کے آخری دن جمرات پر کنکریاں مارنے کی تکمیل کے ساتھ ہی تاخیر سے فارغ ہونے والے حجاج طوافِ وداع کی ادائیگی کے لیے مسجد الحرام جانے سے پہلے منیٰ میں اپنے مناسک کا اختتام کرتے ہیں۔ یہ ایک ایسا ایمانی منظر ہے جو اس مربوط نظام کی عکاسی کرتا ہے جو مملکت نے ضیوف الرحمن کی خدمت اور انہیں آسانی اور اطمینان کے ساتھ اپنے مناسک ادا کرنے کے لیے فراہم کیا ہے۔ ایام تشریق کے دوران حجاج کرام کی نقل و حرکت نے مختلف حکام کے درمیان انضمام کی سطح اور ہجوم کے انتظام اور نقل و حرکت کے لیے آپریشنل اور فیلڈ منصوبوں کی کارکردگی کی عکاسی کی۔ اس انضمام نے سیزن کو کامیاب بنانے اور روانی اور حفاظت کی اعلیٰ ترین سطحوں کو حاصل کرنے میں مدد کی۔

Source: social media