جنوبی اور مشرقی لبنان کے متعدد علاقوں پر اسرائیلی فضائی حملے

اسرائیلی جنگی طیاروں نے جنوبی لبنان کے متعدد قصبوں اور مشرقی لبنان میں مغربی بقاعِ کے ایک قصبے کو نشانہ بناتے ہوئے غارت گری کی ہے۔ لبنان کی سرکاری نیشنل نیوز ایجنسی کے مطابق اسرائیلی ڈرون طیاروں نے جنوبی لبنان کے شہر نبطیہ کو بھی نشانہ بنایا۔ اسرائیلی فوج نے جنوبی لبنان کے نو قصبوں اور مشرقی لبنان میں بقاعِ کے قصبے قلایا کے رہائشیوں کو فوری وارننگ جاری کی ہے جس میں ان سے مکانات فوری خالی کرنے اور ان قصبوں سے ہزار میٹر دور کھلے علاقوں میں چلے جانے کا مطالبہ کیا گیا ہے۔ دو مارچ سے آج پیر تک لبنان پر اسرائیلی حملوں میں جاں بحق ہونے والوں کی تعداد 2869 ہو گئی ۔ زخمیوں کی تعداد 8730 تک پہنچ چکی ہے۔ دوسری جانب حزب اللہ نے آج الگ بیانات میں اعلان کیا ہے کہ اس کے ارکان نے جنوبی لبنان میں صور کے علاقے کی فضائی حدود میں ایک اسرائیلی ڈرون طیارے کا مقابلہ کیا اور جنوبی لبنان میں اسرائیلی فوجیوں اور گاڑیوں کے اجتماعات کو نشانہ بنایا۔ اسرائیلی فوج نے اطلاع دی ہے کہ حزب اللہ نے چند گھنٹوں کے دوران جنوبی لبنان میں تعینات اسرائیلی افواج پر کئی راکٹ اور بارود سے لدے ڈرون طیارے داغے ہیں۔ اسرائیلی فوج اور لبنانی حزب اللہ کے درمیان باہمی حملوں کا سلسلہ جاری ہے۔ یاد رہے امریکی صدر ڈونلڈ ٹرمپ نے اسرائیلی وزیراعظم بنجمن نیتن یاہو اور لبنانی صدر جوزف عون سے مذاکرات کے بعد اپریل کے وسط میں جنگ بندی کا اعلان کیا تھا۔ اپریل کی 23 تاریخ کو اس جنگ بندی میں توسیع کی گئی تھی۔

Source: social media