ریستوراں میں سڑی ہوئی مرغی اور بکری کا گوشت پائے جانے سے ہنگامہ
نامور ریستوراں میں بھرا ہوا سڑا ہوا گوشت! شمالی 24 پرگنہ کے بادوریا بازار میں فوڈ ڈیپارٹمنٹ، میونسپلٹی اور پولیس کی مشترکہ کارروائی میں کلو کلو سڑا ہوا گوشت برآمد ہوا ہے۔ اس میں مرغی اور بکری کا گوشت تھا۔ سڑا ہوا گوشت اس طرح کیوں جمع کیا گیا تھا؟ یہ جاننے کے لیے متعلقہ ریستوراں کو نوٹس جاری کیا گیا ہے۔ اس سے بادوریا میں بڑے پیمانے پر ہلچل مچ گئی ہے۔
مقامی ذرائع کے مطابق، باسیرہاٹ کے بادوریا بازار علاقے کے اس ریستوراں میں طویل عرصے سے کھانے کے معیار کے حوالے سے شکایات آرہی تھیں۔ انہی شکایات کی بنیاد پر فوڈ ڈیپارٹمنٹ، میونسپلٹی کے افسران اور پولیس کی ایک مشترکہ ٹیم نے ریستوراں میں چھاپہ مارا۔ تلاشی کے دوران ذخیرہ شدہ کچھ گوشت کے نمونے لے کر افسران کو شک ہوا۔ بعد میں ان کا معائنہ کیا گیا تو پتہ چلا کہ وہ سڑے ہوئے اور استعمال کے ناقابل تھے۔ اس کے بعد گوشت ضبط کر لیا گیا۔ اس کارروائی سے علاقے میں بڑی ہلچل پھیل گئی۔
ریستوراں میں اتنی مقدار میں گوشت کیسے ذخیرہ تھا، یہ کہاں سے لایا گیا تھا اور کیا یہ گوشت پکا کر صارفین کو پیش کیا جا رہا تھا، ان تمام پہلوو¿ں کی انتظامیہ جانچ کر رہی ہے۔ بادوریا میں اس سے قبل بھی سڑا ہوا گوشت برآمد ہونے کے واقعات پیش آ چکے ہیں۔ چند سال قبل بادوریا کے ایک خفیہ ٹھکانے سے بڑی مقدار میں سڑا ہوا گوشت برآمد ہونے کے واقعے نے پوری ریاست میں سنسنی پھیلا دی تھی۔ اس واقعے میں مردار کا گوشت مختلف ریستورانوں میں سپلائی کیے جانے کے الزامات سامنے آئے تھے۔ تفتیش کے دوران کولکتہ سمیت ریاست کے مختلف حصوں میں چھاپے مار کر سڑا ہوا گوشت برآمد کرنے کے ساتھ ساتھ متعدد افراد کو گرفتار کرنے اور کئی ریستوراں بند کرنے کے اقدامات بھی کیے گئے تھے۔