علی پور دوار کے ہیملٹن گنج میں کالی پوجا میلے کے 14 اسٹال اور دو مکانات آگ کی لپیٹ میں آکر تباہ
جمعہ کی صبح علی پور دوار ضلع کے ہیملٹن گنج میں کالی پوجا میلے کے دوران آتشزدگی سے 14 اسٹال اور دو مکانات جل کر تباہ ہوگئے۔
آگ صبح تقریباً 7 بجے مقامی آر ایس پی دفتر کی نچلی منزل پر لگی۔ دیکھتے ہی دیکھتے آگ قریبی میلے تک پھیل گئی اور ایک کے بعد ایک اسٹال اس کی لپیٹ میں آتے گئے۔
میلے کے میدان سے متصل دو مکانات مکمل طور پر جل کر تباہ ہوگئے، جبکہ دو دیگر گھروں کو جزوی نقصان پہنچا۔ چند ہی منٹوں میں 14 اسٹال جل کر خاکستر ہوگئے۔ مقامی ذرائع کے مطابق، آر ایس پی دفتر کے سامنے کھڑی دو موٹر سائیکلوں میں بھی آگ لگ گئی۔ خدشہ ہے کہ دونوں موٹر سائیکلوں سے پٹرول بہنے کے باعث آگ مزید تیزی سے پھیل گئی۔
مقامی رہائشیوں اور اسٹال مالکان نے آگ پر قابو پانے کی بھرپور کوشش کی۔ کئی اسٹال مالکان آگ بجھانے کے لیے پانی کی تلاش میں ادھر ادھر بھاگتے نظر آئے۔
حسی مارا، جے گاو¿ں اور فالا کاٹا فائر اسٹیشنوں کی فائر بریگیڈ ٹیموں کے ساتھ حسی مارا کے ہندوستانی فضائیہ کے اہلکار بھی موقع پر پہنچے۔ آگ پر قابو پانے کے لیے مجموعی طور پر چھ فائر انجن استعمال کیے گئے۔
آگ پر قابو پانے میں تقریباً چار گھنٹے لگے۔ میلے کے میدان تک پہنچنے والے راستے تنگ اور بھیڑ بھاڑ والے ہونے کی وجہ سے فائر فائٹرز کو کافی مشکلات کا سامنا کرنا پڑا۔
92 سال پرانا یہ مشہور میلہ 9 نومبر کو شروع ہوا تھا اور 22 نومبر کو اختتام پذیر ہونے والا ہے۔ روایت کے مطابق میلے کے بعد ہیملٹن گنج کے کئی اسٹال کوچ بہار کے مشہور راس میلے میں منتقل ہو جاتے ہیں۔
میلہ کمیٹی نے متاثرہ تاجروں اور رہائشیوں کے لیے کھانے اور رہائش کا انتظام کیا ہے۔
میلہ کمیٹی کے جوائنٹ سکریٹری آلوک مترا نے کہا، ”اس میلے کی تاریخ 92 سال پرانی ہے، لیکن اس سے پہلے کبھی ایسا واقعہ پیش نہیں آیا۔ ہم اس حادثے میں نقصان اٹھانے والوں کے ساتھ کھڑے ہیں۔“
وزیر مملکت برائے داخلہ اور پہاڑی امور اور کالچینی کے رکن اسمبلی بشال لاما نے کہا کہ انہوں نے پولیس اور فائر بریگیڈ کے افسران سے آگ لگنے کی اصل وجہ معلوم کرنے کی ہدایت دی ہے۔
علی پور دوار کے ہیملٹن گنج میں کالی پوجا میلے کے 14 اسٹال اور دو مکانات آگ کی لپیٹ میں آکر تباہ...
Source: Admin