بی جے پی حکومت کے 5 ماہ، روزانہ 16 عصمت دری کے واقعات: ترنمول نے اسمبلی کا خصوصی اجلاس بلانے کا مطالبہ کیا
ترنمول کانگریس نے بدھ کے روز بنگال میں بی جے پی حکومت کے خلاف جارحانہ سیاسی مہم شروع کرتے ہوئے پارٹی کے اقتدار میں آنے کے پانچ ماہ کے دوران عصمت دری کے 2,454 مقدمات کا حوالہ دیا، جو اوسطاً روزانہ تقریباً 16 واقعات بنتے ہیں۔
ترنمول نے ریاست بھر میں قانون و انتظام کی مبینہ طور پر بے مثال خرابی پر بحث کے لیے اسمبلی کا فوری خصوصی اجلاس بلانے کا بھی مطالبہ کیا۔
اسمبلی کے باہر پریس کانفرنس سے خطاب کرتے ہوئے ممتا بنرجی کے وفادار اور بیلی گھاٹا کے رکن اسمبلی کنال گھوش نے اپنی وکیل ارکا ناگ کے ساتھ وہ اعداد و شمار پیش کیے جو سابق راجیہ سبھا رکن ساکیت گوکھلے کی جانب سے ریاستی کرائم ریکارڈس بیورو (SCRB) میں حقِ اطلاعات (RTI) کے تحت دائر کی گئی درخواست کے ذریعے حاصل کیے گئے تھے۔
SCRB کے اعداد و شمار کے مطابق، مئی سے 24 ستمبر تک پانچ ماہ کی مدت میں بی جے پی کی نئی حکومت کے تحت ریاست میں عصمت دری کے 2,454، قتل کے 600، قتل کی کوشش کے 13,114 اور شدید چوٹ پہنچانے کے لیے حملے کے 32,341 مقدمات درج ہوئے۔
ممتا بنرجی کے بھتیجے اور ترنمول کے قومی جنرل سکریٹری ابھیشیک بنرجی نے بھی سوشل میڈیا پر ان اعداد و شمار کو نمایاں کرتے ہوئے حکمراں نظام کو، ان کے الفاظ میں، ”ڈبل انجن ڈیزاسٹر“ قرار دے کر تنقید کی۔ انہوں نے کہا کہ ان اعداد و شمار کے مطابق روزانہ اوسطاً 16 عصمت دری، 4 قتل، 87 قتل کی کوششیں اور 216 شدید حملوں کے واقعات سامنے آئے۔
ابھیشیک نے ایکس پر پوسٹ کیا، ”انہوں نے ’ڈبل انجن‘ کا وعدہ کیا تھا۔ بنگال کو ’ڈبل انجن ڈیزاسٹر‘ ملا۔ یہ انتظامی ناکامی اور ووٹ چوری کا نتیجہ ہے—ہر قیمت پر اقتدار، جبکہ عام شہری اس کی قیمت چکا رہے ہیں۔“انہوں نے مزید کہا، ”یہ ایس آئی آر اور ووٹ چوری کا نتیجہ ہے۔ ہر قیمت پر اقتدار۔ بنگال اس کی قیمت چکا رہا ہے۔“
کنال گھوش نے حالیہ حکومت کی تبدیلی سے قبل کی سیاسی بیان بازی سے موجودہ صورتحال کا موازنہ کرتے ہوئے سول سوسائٹی گروپوں اور اپوزیشن کی مبینہ خاموشی پر سوال اٹھایا۔
گھوش نے کہا، ”ذرا سوچئے کہ پہلے خواتین کے خلاف جرائم پر کتنا پروپیگنڈا کیا جاتا تھا۔ آج اس حکومت کے تحت صرف پانچ ماہ میں عصمت دری کے 2,454 مقدمات درج ہوئے ہیں۔ اب موم بتی مارچ کہاں ہیں؟“ انہوں نے انتظامیہ پر ”پولیس اور غنڈہ راج“ چلانے کا الزام لگایا، جس میں سیاسی دھمکی اور مقامی تھانوں میں بنیادی قانونی مدد سے لوگوں کو مبینہ طور پر محروم کرنا شامل ہے۔
وکیل ارکا ناگ نے طریق کار میں خامیوں اور قانونی تقاضوں کی مبینہ خلاف ورزیوں پر سوال اٹھائے۔ ناگ نے الزام لگایا کہ مقررہ 24 گھنٹے کی مدت گزرنے کے بعد بھی باضابطہ ایف آئی آر اکثر آن لائن پورٹل پر اپ لوڈ نہیں کی جاتیں اور پولیس اسٹیشن معمول کے مطابق متاثرین کو واپس بھیج دیتے ہیں یا شکایت کنندگان پر بیانات تبدیل کرنے کے لیے دباو¿ ڈالتے ہیں۔
ناگ نے ماضی کے سیاسی تصادم سے متعلق ایف آئی آر درج کرنے میں تاخیر کے ایک غیر معمولی رجحان کی جانب بھی اشارہ کیا۔ ان کا کہنا تھا کہ بعض پرانے واقعات سے متعلق مقدمات درج کرنے میں تاخیر کی جاتی ہے، جبکہ بعض معاملات میں فوری طور پر مقدمہ درج کر کے جلد ضمانت حاصل کرنے کا راستہ ہموار کیا جاتا ہے۔
ترنمول نے باضابطہ طور پر وزیرِ اعلیٰ شوبھیندو ادھیکاری اور گورنر آر این روی سے مطالبہ کیا ہے کہ وہ جرائم کے اعداد و شمار میں مبینہ اضافے کی وضاحت کرتے ہوئے عوامی بیانات جاری کریں۔
بی جے پی کے ریاستی چیف ترجمان دیب جیت سرکار نے ان الزامات کو مسترد کرتے ہوئے دعویٰ کیا کہ یہ اعداد و شمار ان کی پارٹی کی حکومت کی جانب سے متعارف کرائی گئی شفافیت کا نتیجہ ہیں، جس کے بارے میں ان کا الزام تھا کہ ترنمول کے دور میں ”موجود ہی نہیں تھی“۔
انہوں نے کہا، ”چونکہ شکایات کو باقاعدہ طور پر درج کیا جا رہا ہے اور ریکارڈ درست طریقے سے برقرار رکھے جا رہے ہیں، اس لیے اب یہ اعداد و شمار سامنے آ رہے ہیں... یہ وہ شفافیت ہے جس کا ہم نے وعدہ کیا تھا۔ اس سے صرف یہ ظاہر ہوتا ہے کہ جرائم کی مناسب طور پر اطلاع دی جا رہی ہے اور اس کے بعد کارروائی بھی کی جا رہی ہے۔ یہی اچھی حکمرانی ہے۔“