بردوان میں بچے کی موت کے معاملے میں ’جعلی‘ ڈاکٹر گرفتار
بردوان کے نوباب ہاٹ موڑ پر واقع ایک نرسنگ ہوم میں آپریشن کے بعد چار سالہ بچے ارنیا رائے کی موت کے معاملے میں ’جعلی‘ ڈاکٹر شیخ سیدال حق کو بالآخر پولیس نے گرفتار کر لیا۔ انہیں دہلی سے بردوان لایا گیا۔ بدھ کو ملزم کو بردوان چیف جوڈیشل مجسٹریٹ (CJM) عدالت میں پیش کیا گیا، جہاں تفتیش کے لیے پولیس نے 10 دن کی تحویل کی درخواست کی۔ عدالت نے ملزم کو چھ دن کی پولیس حراست میں رکھنے کی اجازت دی۔
پولیس ذرائع کے مطابق، سیدال کا آبائی گھر بردوان کے دیوان دِگھی تھانے کے علاقے عالم پور میں ہے۔ فی الحال وہ بردوان شہر کے گولاپ باغ موڑ علاقے میں واقع ایک رہائشی عمارت میں رہتے تھے۔ الزام ہے کہ بچے کی موت کے واقعے کے بعد سے ہی ملزم روپوش تھا۔ بیرونِ ملک فرار ہونے کے خدشے کے پیش نظر پولیس نے اس کے خلاف لک آو¿ٹ نوٹس جاری کرنے کی درخواست دی تھی۔ بعد میں بیورو آف امیگریشن نے اس کے خلاف لک آو¿ٹ نوٹس جاری کر دیا۔ اس کے ساتھ ہی پولیس نے ملزم کی گرفتاری کے لیے وارنٹ جاری کرنے کی درخواست بھی کی۔ درخواست منظور کرتے ہوئے سی جے ایم عدالت نے ملزم کے خلاف وارنٹ جاری کرنے کا حکم دیا۔
منگل کو دہلی ہوائی اڈے سے فیکس کے ذریعے بردوان تھانے کو سیدال کو روکے جانے کی اطلاع دی گئی۔ پولیس ذرائع کا دعویٰ ہے کہ وہ دہلی سے شارجہ جانے والی پرواز پکڑنے کی تیاری میں تھا۔ اطلاع ملتے ہی بردوان پولیس نے دہلی ایئرپورٹ حکام سے رابطہ کیا۔ اسی رات دہلی ایئرپورٹ سے اسے حراست میں لے لیا گیا۔ بدھ کو ملزم کو بردوان لایا گیا۔
پولیس کا دعویٰ ہے کہ پوچھ گچھ کے دوران سیدال نے ’جعلی‘ میڈیکل سرٹیفکیٹ استعمال کرکے علاج کرنے کی بات تسلیم کی ہے۔ تفتیش کار یہ بھی جاننے کی کوشش کر رہے ہیں کہ وہ مزید کن کن نرسنگ ہومز میں علاج کرتا تھا۔