دوست کے والد کی بندوق سے کھیلتے وقت اچانک طالب علم کو لگی گولی! کھڑگپور فائرنگ کیس میں نیا انکشاف، تین افراد گرفتار
کھڑگپور شہر میں فائرنگ کے واقعے میں نیا انکشاف ہوا ہے۔ دوست ساگر کے والد کی بندوق کو دیکھتے اور ہاتھ میں لیتے وقت احتیاط نہ برتنے کے باعث اسکول کے طالب علم اکشے جھا کو اچانک گولی لگ گئی۔ پولیس سپرنٹنڈنٹ پاپیا سلطانہ نے بتایا کہ یہ گینگ وار کا واقعہ نہیں ہے۔ بندوق کے ساتھ چھیڑ چھاڑ کے دوران ہی یہ واقعہ پیش آیا۔ زخمی اسکول کا طالب علم اکشے فی الحال زیرِ علاج ہے۔
پاپیا نے بتایا کہ اس معاملے میں اکشے کے دوست ساگر کمار سمیت تین افراد کو کھڑگپور ٹاو¿ن تھانے کی پولیس نے گرفتار کیا ہے۔ ساگر کے علاوہ گرفتار کیے گئے دیگر دو نوجوانوں کے نام کولا یوگیشور راو¿ اور وشال جانا ہیں۔ تینوں گرفتار افراد کے گھر اولڈ سیٹلمنٹ علاقے میں ہیں۔ ان کی عمریں 22 سے 23 سال کے درمیان ہیں۔ ان کے خلاف اقدامِ قتل اور آرمز ایکٹ کے تحت مقدمات درج کیے گئے ہیں۔ ایک اور شخص کی تلاش جاری ہے۔
جمعرات کو پولیس سپرنٹنڈنٹ نے تینوں گرفتار افراد کو ساتھ لے کر پریس کانفرنس کی۔ انہوں نے بتایا کہ ایک نائن ایم ایم پستول اور تین کارتوس برآمد کیے گئے ہیں۔ پولیس ذرائع کے مطابق، اکشے کبھی کبھار پڑوس میں رہنے والے ساگر کے ساتھ گھومنے جاتا تھا۔ دونوں خاندانوں کے گھروں میں بھی ایک دوسرے کا آنا جانا تھا۔ بدھ کی صبح بھی اکشے ساگر کے گھر گیا تھا۔ وہاں ساگر اپنے والد وینکٹ راو¿ کی بندوق دیکھ رہا تھا۔ اکشے نے ساگر کے ہاتھ سے بندوق لے کر اسے دیکھنا شروع کیا۔ اسی دوران احتیاط نہ برتنے کی وجہ سے گولی چل گئی۔ پہلے فائرنگ کی ایک کوشش ناکام ہوئی، لیکن اس کے بعد ایک گولی اکشے کے سینے کے بائیں جانب لگ گئی۔ پولیس نے ساگر کے گھر سے خون آلود کپڑے اور خون کے نمونے بھی جمع کیے ہیں۔
ایس پی نے کہا، ”یہ گینگ وار کا واقعہ نہیں ہے۔ کھڑگپور شہر میں ایسا ماحول دوبارہ واپس نہیں آنے دیا جائے گا۔ کسی بھی صورت میں عام لوگوں کی آمدورفت میں رکاوٹ پیدا نہیں ہونے دی جائے گی۔ تمام جرائم پیشہ افراد کے ٹھکانوں پر تلاشی لے کر ہتھیار ضبط کیے جائیں گے۔“
دوسری جانب، بدھ کی رات ہی اکشے کی سرجری کی گئی۔ فی الحال وہ کولکاتا کے ایک اسپتال میں زیرِ علاج ہے۔ پولیس سپرنٹنڈنٹ نے بتایا کہ اکشے کے گولی لگنے کے بعد ساگر خوف زدہ ہو گیا اور اس نے اپنے دوستوں کو فون کرکے بلایا۔ اس کے بعد انہی لوگوں نے اکشے کو اسپتال پہنچایا۔ بعد میں انہوں نے حملے کی ایک فرضی کہانی بنا دی۔
ریاستی وزیر اور کھڑگپور کے رکنِ اسمبلی دلیپ گھوش نے کہا، ”ایک وقت میں کھڑگپور میں مافیا راج تھا۔ اب بھی بہت سے آتشیں ہتھیار موجود ہیں۔ پولیس انہیں برآمد کرنے کی کوشش کر رہی ہے۔ جو واقعہ پیش آیا، وہ آپس کا معاملہ ہے۔ اچانک ہی گولی چل گئی۔ حالات کو درست کرنے کے لیے پولیس کام کر رہی ہے۔“