نندی گرام کے کانگریس امیدوار کو ضمانت نہیں ملی، کیا جیل میں رہ کر ہی لڑیں گے انتخاب؟
نندی گرام کے کانگریس امیدوار ملن پردھان کو ضمانت نہیں ملی۔ عدالت نے انہیں آئندہ 3 اکتوبر تک عدالتی حراست میں رکھنے کا حکم دیا ہے۔ اس حلقے میں 6 اکتوبر کو ضمنی انتخاب ہونا ہے۔ ایسے میں یہ سوال اٹھنے لگا ہے کہ کیا کانگریس امیدوار کو جیل کی سلاخوں کے پیچھے سے ہی انتخابی مہم چلانی پڑے گی؟ کیا وہ جیل میں رہ کر ہی انتخابی مقابلہ کریں گے؟ اس سلسلے میں سیاسی حلقوں میں بحث شروع ہوگئی ہے۔
اطلاع کے مطابق، آئندہ پیر کو ملن کو ایک اور مقدمے میں عدالت میں پیش کیا جائے گا۔ پولیس ذرائع کے مطابق 2007 میں نندی گرام تحریک کے دوران قتل کے ایک مقدمے میں ان کا نام سامنے آیا تھا۔ نندی گرام اور کھیجوری میں قتل اور آرمس ایکٹ کے تحت ملن کے خلاف چار مقدمات درج ہیں۔ تقریباً دو دہائی پرانے انہی مقدمات میں جمعہ کے روز انہیں گرفتار کیا گیا تھا۔