ہوڑہ میں وارڈوں کی حدبندی کو کلکتہ ہائی کورٹ میں چیلنج
ہوڑہ میونسپل کارپوریشن کی میئر اِن کونسل کے سابق رکن نے شہر کے بلدیاتی ادارے میں وارڈوں کی تعداد موجودہ 50 سے بڑھا کر 68 کرنے کے حدبندی کے عمل کو چیلنج کرتے ہوئے کلکتہ ہائی کورٹ سے رجوع کیا ہے۔ یہ معاملہ ایسے وقت میں سامنے آیا ہے جب بلدیاتی انتخابات میں تاخیر کے درمیان بلدیاتی بورڈ چلانے کے لیے کوآرڈینیٹرس کی تقرری پر سیاسی بحث شدت اختیار کر گئی ہے۔
مغربی بنگال کے وزیر اعلیٰ شوبھندو ادھیکاری نے جمعرات کو ہاوڑہ کے شیب پور میں ایک مذہبی تقریب سے خطاب کرتے ہوئے کہا تھا، ”جو لوگ انتخابات میں اپنی ضمانت ضبط ہونے کے خوف سے پریشان ہیں، وہی انتخابی عمل میں رکاوٹ ڈال رہے ہیں۔ ہم صرف ایسے لوگوں کو کوآرڈینیٹر مقرر کریں گے جو حکومت کے ساتھ کھڑے ہوں اور اس کی مخالفت نہ کریں۔“
اس ہفتے کے اوائل میں کولکاتا میونسپل کارپوریشن (کے ایم سی) کے لیے کوآرڈینیٹرس کی تقرری کی تجویز سامنے آئی تھی۔ اس کی وجہ یہ تھی کہ کلکتہ ہائی کورٹ نے کے ایم سی کے وارڈوں کی حدبندی کو چیلنج کرنے والی عرضی پر باقاعدہ بنچ کے فیصلے تک ریاستی حکومت کو بلدیاتی انتخابات کے نوٹیفکیشن جاری کرنے سے روک دیا تھا۔
ہاوڑہ میونسپل کارپوریشن، جہاں 2013 کے بعد سے انتخابات نہیں ہوئے ہیں، میں بھی آئندہ ہفتے عرضی پر سماعت کے بعد کوآرڈینیٹرس کی تقرری کا معاملہ سامنے آسکتا ہے۔
عرضی داخل کرنے والے امتیاز احمد نے کہا، ”ہاوڑہ میں ایک دہائی سے زیادہ عرصے سے انتظامی من مانی جاری ہے۔ 2018 سے منتظمین بلدیاتی ادارے چلا رہے ہیں اور اب نئی حکومت منتخب کونسلروں کے بجائے کوآرڈینیٹرس مقرر کرنا چاہتی ہے۔“
انہوں نے مزید کہا، ”ہاوڑہ میونسپل کارپوریشن ایکٹ کی دفعہ 219 واضح کرتی ہے کہ وارڈوں کی فہرست میں تبدیلی صرف کارپوریشن کی سفارش پر ہی کی جاسکتی ہے۔ یہاں نہ کوئی بورڈ ہے اور نہ ہی میئر اِن کونسل۔ پھر کس کی سفارش پر حدبندی کا عمل انجام دیا گیا؟“
امتیاز احمد نے کہا، ”ہم بھی چاہتے ہیں کہ انتخابات ہوں۔ 500 سال قدیم شہر ہاوڑہ گزشتہ 10 برسوں میں پوری طرح تباہ ہوچکا ہے۔“
دوسری جانب کولکاتا میونسپل کارپوریشن میں وارڈوں کی تعداد 144 سے بڑھا کر 209 کردی گئی ہے۔ سی پی ایم کے سابق کونسلر داس کی جانب سے داخل عرضی میں وارڈوں کے درمیان آبادی کی غیر مساوی تقسیم پر اعتراض کیا گیا ہے۔ عرضی میں دعویٰ کیا گیا ہے کہ بعض وارڈوں کی حدبندی سے بی جے پی کو غیر منصفانہ فائدہ پہنچ سکتا ہے۔
منگل کو وزیر اعلیٰ شوبھندو ادھیکاری نے اعلان کیا تھا کہ انتخابات ہونے تک بلدیاتی خدمات کے انتظام کے لیے حکومت بی جے پی کے لوگوں کو ”کوآرڈینیٹر“ مقرر کرے گی۔
تاہم بی جے پی کے اندرونی ذرائع کے مطابق، کوآرڈینیٹرس کی تقرری کے سلسلے میں ابھی تک کوئی حتمی فیصلہ نہیں کیا گیا ہے۔
ریاست کی شہری ترقی اور بلدیاتی امور کی وزیر اگنی مترا پال نے کہا، ”یہ ایک عارضی انتظام ہے۔ میں اور میرا دفتر ہر جگہ نظر نہیں رکھ سکتے کہ کہاں اسٹریٹ لائٹس کام نہیں کر رہی ہیں۔ شہری سہولتیں فراہم کرنا بلدیاتی اداروں اور کونسلروں کی ذمہ داری ہے۔ ہمیں شہری خدمات جاری رکھنی ہوں گی۔“
انہوں نے کہا کہ کوآرڈینیٹرس کے ناموں کا فیصلہ پارٹی کرے گی۔شیب پور کے رکن اسمبلی رودرنیل گھوش نے ہاوڑہ میں شہری سہولتوں کی بدحالی کے لیے سابقہ بائیں محاذ اور ترنمول کانگریس کے زیر انتظام بورڈوں کو ذمہ دار ٹھہرایا۔انہوں نے کہا، ”بائیں محاذ کے زیر انتظام بورڈوں نے سڑکیں بناتے اور نکاسی کے نظام کو بہتر بناتے وقت مستقبل کی ضروریات کو ذہن میں نہیں رکھا۔ بیشتر وارڈوں میں موجودہ نظام ناکافی ہے، یہ کہنا بھی حقیقت کو کم بیان کرنے کے مترادف ہوگا۔ ترنمول کے کونسلر صرف پیسہ کمانے میں دلچسپی رکھتے تھے۔“
رودرنیل گھوش نے مزید کہا، ”آج ہاوڑہ ملک کا سب سے گندا شہر بن چکا ہے۔ اب کوآرڈینیٹرس کے بغیر شہری سہولتیں فراہم کرنا ممکن نہیں رہا۔“
بی جے پی نے حدبندی کے عمل کو عدالت میں چیلنج کیے جانے سے پہلے ہی بلدیاتی انتخابات کے لیے اپنے امیدواروں کے انتخاب کا عمل شروع کردیا تھا۔ ذرائع کے مطابق، حکمراں جماعت کوآرڈینیٹرس کی تقرری کے معاملے میں آگے بڑھنے سے پہلے عدالت کے فیصلے کا انتظار کر رہی ہے۔
کے ایم سی کے سابقہ بورڈ میں کونسلر رہ چکے بی جے پی کے ایک رکن اسمبلی نے کہا، ”مجھے کوآرڈینیٹرس کی تقرری کے بارے میں کوئی اطلاع نہیں ہے۔“
ہوڑہ میں وارڈوں کی حدبندی کو کلکتہ ہائی کورٹ میں چیلنج...
Source: Admin
