بمراہ کی شاندار گیندبازی، ہندستان نے انگلینڈ کو 387 رن پر روکا

لندن، 11 جولائی:)جسپریت بمراہ (74 رنز کے عوض 5 وکٹ)، محمد سراج اور نیتیش کمار ریڈی (دو، دو وکٹ) کی شاندار گیندبازی کی بدولت ہندوستان نے جمعہ کے روز تیسرے ٹیسٹ میچ کے دوسرے دن چائے کے وقفے سے پہلے انگلینڈ کو 387 رنز پرسمیٹ دیا۔ کل کے اسکور چار وکٹ پر 251 رنز سے آگے کھیلنے اتری انگلینڈ کی ٹیم آج صبح کے سیشن میں بمراہ کی خطرناک گیندبازی کا شکار ہو گئی۔ کپتان بین اسٹوکس نے اپنی اننگز میں صرف 5 رنز کا اضافہ ہی کیا تھا کہ بمراہ نے انہیں بولڈ کر کے ہندستان کو پانچویں کامیابی دلائی۔ بین اسٹوکس نے 110 گیندوں پر چار چوکوں کی مدد سے 44 رنز بنائے ۔ اسی دوران جو روٹ نے چوکا لگا کر اپنی ٹیسٹ سنچری مکمل کی۔ یہ جو روٹ کے 156 ٹیسٹ میچز کے کیریئر کی 37ویں اور ہندستان کے خلاف 11ویں ٹیسٹ سنچری تھی۔سنچری مکمل کرنے کے بعد بمراہ نے انہیں بھی بولڈ کر کے پویلین کی راہ دکھائی۔جو روٹ نے 199 گیندوں پر 104 رنز کی شاندار اننگز کھیلی۔کریس ووکس (صفر) کو بھی بمراہ نے آوٹ کیا۔ لنچ تک انگلینڈ نے سات وکٹ پر 353 رنز بنا لیے تھے ۔لنچ کے بعد محمد سراج نے جیمی اسمتھ (51) کو آوٹ کر کے ہندستان کو اہم آٹھویں کامیابی دلائی۔ اس کے بعد جوفرا آرچر (چار) کو بمراہ نے بولڈ کر کے اپنا پانچواں اورہندستان کے لیے نواں وکٹ حاصل کیا۔113ویں اوور کی تیسری گیند پر محمد سراج نے برائیڈن کارس (56) کو آوٹ کر کے انگلینڈ کی پہلی اننگز کو 387 رنز پر سمیٹ دیا۔ بمراہ نے شاندار گیندبازی کی اور محمد سراج نے ان کا خوب ساتھ دیا۔حالانکہ جیمی اسمتھ اور برائیڈن کارس کے درمیان جو شراکت داری ہوئی، اس سے ہندستانی ٹیم ضرور مایوس ہوئی، اسی لیے انگلینڈ کی ٹیم 400 کے قریب پہنچ گئی۔ہندستان کی طرف سے جسپریت بمراہ نے 74 رنز کے عوض 5 وکٹ حاصل کیے ۔انہوں نے پہلے ٹیسٹ کی پہلی اننگز میں بھی پانچ وکٹ لیے تھے ۔محمد سراج اور نتیش کمار ریڈی کو دو، دو وکٹ ملے ۔رویندر جڈیجہ نے ایک بلے باز کو آوٹ کیا۔

Source: uni news