آلو کی پیداوار میں خود کفالت کی راہ پر بنگال، ریاست میں ہی بیج کی تحقیق ہوگی
آلو کی پیداوار میں مزید ایک قدم آگے بڑھ کر خود کفیل ہونے کے مقصد سے مغربی بنگال میں بہتر اور بیماری سے پاک آلو کے بیج کی پیداوار کے لیے جدید ٹیکنالوجی کو وسعت دینے کا اقدام کیا جا رہا ہے۔ ریاست کے کسانوں کو اعلیٰ معیار کا بیج آسانی سے پہنچانا اور ساتھ ہی آلو کی پیداواری صلاحیت اور کسانوں کی آمدنی بڑھانا اس اقدام کا بنیادی مقصد ہے۔ اس سلسلے میں ہماچل پردیش کے شملہ میں واقع آئی سی اے آر-سینٹرل پوٹیٹو ریسرچ انسٹی ٹیوٹ (سی پی آر آئی) کی تحقیقی اور تکنیکی مدد لی جائے گی۔ حال ہی میں مرکزی وزیر زراعت شیوراج سنگھ چوہان مغربی بنگال کے دورے پر آئے تھے۔ اس دوران ریاست میں آلو کے بیج کی پیداوار کے حوالے سے مرکز اور ریاست کے درمیان ایک تکنیکی تعاون سے متعلق مفاہمت نامے (ایم او یو) پر دستخط ہوئے ہیں۔

شملہ میں سی پی آر آئی کے ہیڈکوارٹر میں ادارے کے ڈائریکٹر ڈاکٹر برجیش سنگھ نے کہا کہ اعلیٰ معیار کے بیج کی پیداوار میں جدید ٹیکنالوجی کا استعمال انتہائی مو¿ثر ثابت ہو سکتا ہے۔ خاص طور پر ہائی ٹیک بیج کی پیداوار، ٹشو کلچر اور ایروپونکس ٹیکنالوجی کے مو¿ثر فروغ کے ذریعے کسانوں کو صحت مند پودے لگانے کا مواد فراہم کرنا ممکن ہے۔ اس سے آلو کی پیداوار اور معیار میں اضافے کے ساتھ ساتھ کسانوں کی آمدنی میں بھی اضافہ ہو سکتا ہے۔ انہوں نے مزید بتایا کہ مغربی بنگال میں آلو کے بیج کی تحقیق اور پیداوار سے متعلق معاملات پر ریاست-مرکز مفاہمت نامے پر دستخط ہوئے ہیں۔ اس سلسلے میں اب ایک ٹیم بنائی جائے گی۔ فی الحال یہ طے ہوا ہے کہ شمالی بنگال اور جنوبی بنگال میں دو حصوں میں تحقیق کی جائے گی۔ بنگال کی آب و ہوا اور نوعیت کے مطابق آلو کے بیج پر تحقیق کی جائے گی۔ ایک زمانے میں ہماچل سے مغربی بنگال میں سب سے زیادہ آلو کا بیج سرکاری طور پر آتا تھا۔ بعد میں مختلف وجوہات کی بنا پر یہ بند ہو گیا۔ اس وقت پنجاب سے یہاں آلو کا بیج آتا ہے۔ ریاست میں ہی آلو کے بیج کی تحقیق اور پیداوار ہونے سے کاشت کے اخراجات میں کچھ کمی آئے گی، کیونکہ نقل و حمل کا خرچ کم ہو جائے گا۔