بائیکاٹ کی اپیلوں کےبعداسرائیل کویوروویژن سےنکال کرنئےایشیائی مقابلےمیں منتقل کرنےکی تجویز

اسرائیلی اخبار یدیعوت احرونوت کی ویب سائٹ ( نے اطلاع دی ہے کہ یورپی براڈکاسٹنگ یونین کے اندر بند کمرے کے مذاکرات کے دوران ایک تجویز پیش کی گئی ہے جس کے تحت اسرائیل کو یورپی نغموں کے مقابلے (یورو ویژن) سے بے دخل کر کے ایشیا میں منعقد ہونے والے نئے مقابلے میں منتقل کر دیا جائے۔ وائی نیٹ سے بات کرنے والے دو ذرائع کے مطابق، یہ تجویز پیش کی گئی اور اس پر بحث بھی ہوئی، جبکہ اسرائیل کی شرکت کی منتقلی کے حوالے سے ان ممالک کی رائے جاننے کی کوشش بھی کی گئی جو پہلے ہی "یورو ویژن ایشیا" میں شامل ہو چکے ہیں یا اس میں شمولیت کے لیے مذاکرات کر رہے ہیں۔ ان دو ذرائع کے مطابق اس پر جزوی مخالفت بھی سامنے آئی ہے اور ایسا لگتا ہے کہ آخر کار اس اقدام پر آگے بڑھنا یقینی نہیں ہے۔ اتوار کے روز ویانا میں یورو ویژن گائیکی کے مقابلے کی تقریبات کا آغاز ہو گیا جو فائنل تقریب یعنی 16 مئی تک جاری رہیں گی۔ اگرچہ اسرائیل کی شرکت کے خلاف احتجاجاً اس تقریب کے بائیکاٹ کی اپیلیں کی گئی تھیں تاہم اس کے باوجود دنیا بھر سے ہزاروں افراد شرکت کر رہے ہیں۔ اسرائیل کی شرکت کی وجہ سے اسپین، آئرلینڈ، آئس لینڈ، نیدرلینڈز اور سلووینیا کے نشریاتی اداروں نے دست برداری کا اعلان کر دیا ہے۔ ایک ہزار سے زائد فن کاروں اور گلوکاروں نے تقریبات کے بائیکاٹ کی اپیل کی ہے، جبکہ ویانا میں فلسطینیوں اور اسرائیل کے حق میں الگ الگ مظاہرے کیے جانے کی توقع ہے۔ آسٹریا کے دارالحکومت ویانا نے دنیا بھر میں ٹیلی ویژن پر سب سے زیادہ دیکھے جانے والے اس مقابلے کے 70 ویں ایڈیشن کی میزبانی کے لیے تیاریاں مکمل کر لیں، جہاں سیاحوں اور شہر کے رہائشیوں کے لیے بیرونی تقریبات کا ایک وسیع سلسلہ ترتیب دیا گیا ہے۔ سہ پہر کے وقت ریڈ کارپٹ کی تقریبات شروع ہوئیں۔ واضح رہے کہ اس تقریب کے لیے قالین کا رنگ فیروزی منتخب کیا گیا ہے تاکہ مقامی وقت کے مطابق دو بجے (گرین وچ ٹائم کے مطابق دوپہر 12 بجے) شروع ہونے والی افتتاحی تقریب میں شریک 35 ممالک کے وفود کا استقبال کیا جا سکے۔ الیکٹرانک بیٹنگ ویب سائٹس کے مطابق اس سال جیت کے لیے فن لینڈ کو فیورٹ قرار دیا جا رہا ہے، جسے گلوکار پیٹ بارکونن اور وائلن نواز لنڈا لیمبینیئس کی جوڑی کے ذریعے انعام جیتنے کی امید ہے۔ یونان، ڈنمارک، فرانس اور آسٹریلیا کے جیتنے کے امکانات بھی روشن ہیں، جبکہ اسٹار ڈیلٹا گوڈریم کو ثقافتی سفارت کاری کی حمایت کے لیے کینبرا سے حکومتی فنڈنگ بھی موصول ہوئی ہے۔ امیدواروں میں اسرائیلی نوام بیتان بھی شامل ہیں جن کے گیت میں فرانسیسی زبان کا ایک حصہ بھی شامل ہے۔

Source: social media