بہار: امدادی سامان پہنچانے والا ہیلی کاپٹر گر کر تباہ

پٹنہ، 02 اکتوبر : بہار میں مظفر پور کے اورائی تھانہ علاقے میں سیلاب متاثرین کے لیے امدادی سامان لے جانے والا ایک ہیلی کاپٹر گر کر تباہ ہو گیا، تاہم کسی جانی نقصان کی اطلاع نہیں ہے۔ حادثے کی اطلاع ملتے ہی انتظامیہ کی ٹیم موقع پر پہنچنے کی کوشش کر رہی ہے۔ نیشنل ڈیزاسٹر ریسپانس فورس (این ڈی آر ایف) اور اسٹیٹ ڈیزاسٹر ریسپانس فورس (ایس ڈی آر ایف) کی ٹیمیں موقع پر پہنچنے کی کوشش کر رہی ہیں۔ پانی کا بہاؤ تیز ہونے کے باعث ٹیم موقع پر نہ پہنچ سکی۔ ابتدائی اطلاعات کے مطابق ہیلی کاپٹر گرنے کے بعد امدادی سامان پہنچانے والی ٹیم نے پانی میں چھلانگ لگا کر جان بچائی۔ فی الحال اس معاملے میں کوئی سرکاری اطلاع موصول نہیں ہوئی ہے۔ ہیلی کاپٹر اس وقت گر کر تباہ ہوا جب فضائیہ کے اہلکار امدادی سامان پہنچا رہے تھے۔ موصولہ اطلاعات کے مطابق اس واقعے میں پائلٹ شدید زخمی ہے جبکہ تین افراد محفوظ بتائے جاتے ہیں۔ بتایا جا رہا ہے کہ ہیلی کاپٹر انجن میں خرابی کے باعث گر کر تباہ ہوا۔ دربھنگہ میں سیلاب میں فضائیہ کا ہیلی کاپٹر امدادی کاموں میں مصروف تھا۔ حادثہ امدادی کام سے واپسی کے دوران پیش آیا۔ ہیلی کاپٹر نے سیتامڑھی سے امدادی سامان لے کر اڑان بھری تھی۔

Source: uni news service