ایران کا جوہری مراکز کے معائنے سے صاف انکار

ایرانی وزارت خارجہ کے ترجمان اسماعیل بقائی نے واضح کیا ہے کہ عالمی ایٹمی توانائی ایجنسی آئی اے ای اے کو نشانہ بننے والی جوہری تنصیبات کے دورے کی اجازت دینے کا ارادہ نہیں۔ اسماعیل بقائی نے کہا کہ جوہری عدم پھیلاؤ معاہدے کے بحیثیت رکن ملک ایران موجودہ اور شفاف بین الاقوامی ضابطہ کار پر عمل کرے گا تاہم جوہری مراکز کے معائنے کے لیے آئی اے ای اے کے دوروں سے متعلق کوئی واضح شیڈول طے نہیں۔ انہوں نے کہا کہ ایران کے بحال فنڈز کے استعمال کا طریقہ کار ملکی مفادات کے مطابق طے ہو گا جب کہ لبنان پر جنگ کا خاتمہ امریکاکے ساتھ ہونیوالی مفاہمتی یادداشت کی بنیادی شرط ہے۔ اسماعیل بقائی نے کہا کہ ایران کی میزائل طاقت امریکاکے ساتھ ہونیوالے مذاکرات کا حصہ نہیں۔ اس سے قبل الجزیرہ کی رپورٹ کے مطابق ترجمان ایرانی وزارت خارجہ کا کہنا ہے کہ امریکا سے مذاکرات میں جوہری پروگرام سے متعلق نیا معاہدہ یا وعدہ نہیں کیا گیا ہے۔ ان کا کہنا تھا کہ عالمی ایٹمی توانائی ایجنسی (آئی اے ای اے) کے ساتھ رابطے کو ملکی قوانین سے مشروط کرنے کا فیصلہ کر لیا ہے اور آئی اے ای اے انسپکٹرز کی واپسی سے متعلق ایران نے فی الحال کوئی واضح فیصلہ نہیں کیا۔ اسماعیل بقائی نے کہا کہ ایٹمی ایجنسی سے تعاون ایرانی پارلیمنٹ اور نیشنل کونسل کے قوانین کے تحت ہی ہوگا۔ الجزیرہ کا کہنا ہے کہ ایرانی وزارت خارجہ کے ترجمان کے بیان میں مستقبل میں ایٹمی تنصیبات کے معائنے کا امکان رد نہیں کیا گیا ہے۔ دوسری جانب امریکی نائب صدر جے ڈی وینس نے دعویٰ کیا ہے کہ ایران آئی اے ای اے انسپکٹرز کو دوبارہ آنے کی اصولی منظوری دے چکا ہے۔

Source: Social Media