ایران کے پاس ایک "اچھا معاہدہ" کرنے کا موقع ہے : امریکی وزیرِ جنگ

تہران اور واشنگٹن کے درمیان مذاکرات میں تعطل کے باوجود امریکی وزیر جنگ پیٹ ہیگستھ (وزیر دفاع) نے اعلان کیا ہے کہ ایران کے پاس امریکہ کے ساتھ ایک "اچھا معاہدہ" کرنے کا موقع موجود ہے، تاہم انہوں نے یہ بھی واضح کیا کہ وقت تہران کے حق میں نہیں۔ آج جمعے کو وائٹ ہاؤس میں صحافیوں سے گفتگو کرتے ہوئے ہیگستھ نے کہا کہ "ایران کے پاس سنجیدہ معاہدہ کرنے کا ایک تاریخی موقع ہے اور اب گیند اس کے کورٹ میں ہے"۔ انہوں نے اشارہ کیا کہ ایران پر بحری حصار مزید "سخت" ہوتا جا رہا ہے۔ انہوں نے مزید کہا کہ "ہم آبنائے ہرمز کا مکمل محاصرہ کر رہے ہیں"۔ ان کے مطابق امریکی بحریہ نے اب تک 34 بحری جہازوں کو راستہ تبدیل کرنے اور آبنائے ہرمز سے واپس جانے پر مجبور کیا ہے۔ امریکی وزیر جنگ نے خبردار کیا کہ اگر مزید بارودی سرنگیں بچھانے کی کوشش کی گئی تو یہ جنگ بندی کی خلاف ورزی تصور ہو گی۔ تاہم ہیگستھ نے یہ بھی کہا کہ کچھ جہاز آبنائے ہرمز سے بحفاظت گزر رہے ہیں ... اور یہ واضح کرنا ضروری ہے کہ آبنائے ہرمز سے بارودی سرنگوں کی صفائی کے لیے کسی حتمی ٹائم فریم کا تعین نہیں کیا جا سکتا۔ انہوں نے ہرمز کے حوالے سے یورپی کوششوں کو اب تک غیر سنجیدہ قرار دیا۔ امریکی وزیر دفاع کے بیان کے کچھ ہی دیر بعد ویب سائٹ "axios" نے انکشاف کیا کہ ایران نے رواں ہفتے کے آغاز میں آبنائے ہرمز میں مزید بارودی سرنگیں بچھائی ہیں۔ دوسری جانب امریکی چیف آف اسٹاف جنرل ڈین کین نے کہا ہے کہ امریکہ بحر الکاہل اور بحر ہند میں ایرانی جہازوں کے خلاف کارروائیاں جاری رکھے گا۔ ہیگستھ کے ساتھ مشترکہ پریس کانفرنس میں انہوں نے کہا کہ "امریکہ آبنائے ہرمز کا مکمل محاصرہ کر رہا ہے" اور ایرانی شیڈو فلیٹ (خفیہ بیڑے) کے جہازوں کو روکنے کا عمل جاری رہے گا۔ یہ بیانات ایک ایسے وقت میں سامنے آئے ہیں جب امریکہ نے ایران کے قریب سمندری حدود میں اپنا تیسرا طیارہ بردار بحری جہاز روانہ کر دیا ہے۔ اس اقدام کا مقصد سیاسی مذاکرات میں تعطل کے ساتھ ساتھ فوجی دباؤ کو مزید بڑھانا ہے۔

Source: social media